07.10.2026 | 10:15
Հայաստանի ներկայացուցիչները ադրբեջանցի և միջազգային փորձագետների հետ Լոնդոնում մասնակցել են աշխատաժողովի
Պուտինի մրցակից Նադեժդինն անհրաժեշտ ստորագրությունները ԿԸՀ է ներկայացրել
Քաղաքականություն
31.01.2024 | 19:52
Ռուս քաղաքական գործիչ Բորիս Նադեժդինը, որը հավակնում է ՌԴ նախագահի պաշտոնին, Կենտրոնական ընտրական հանձնաժողով է ներկայացրել թեկնածությունը գրանցելու համար անհրաժեշտ ստորագրությունները, գրում է DW-ի ռուսական ծառայությունը։ Նա տելագրամի իր ալիքում հայտնել է, որ ԿԸՀ է տարել 105 հազար ստորագրություն՝ անհրաժեշտ 100 հազարը և թույլատրելի լրացուցիչ 5 տոկոսը։
«Ահա՛ իմ հպարտությունը, հազարավոր մարդկանց անքուն բազմօրյա աշխատանքի արդյունքը։ ԿԸՀ-ի ու գործող իշխանությունների համար շատ դժվար է լինելու։ Նույնիսկ չնկատեցի փղին»,- գրել է նա։
ԿԸՀ-ն տասնօրյա ժամկետում պետք է որոշում կայացնի Նադեժդինին որպես նախագահի թեկնածու գրանցելու մասին։ Քաղաքական գործչին առաջադրել է «Քաղաքացիական նախաձեռնություն» կուսակցությունը։
ՌԴ-ում նախագահական ընտրությունները տեղի են ունենալու մարտի 15-17-ը։ Օրերս ԿԸՀ-ն գրանցել էր Վլադիմիր Պուտինի թեկնածությունը։ Ավելի վաղ գրանցվել էին Ռուսաստանի Լիբերալ-դեմոկրատական կուսակցության ղեկավար Լեոնիդ Սլուցկին, «Նոր մարդիկ» կուսակցության անդամ, Պետդումայի փոխխոսնակ Վլադիսլավ Դավանկովը և Պետդումայի պատգամավոր Նիկոլայ Խարիտոնովը։
