12.08.2026 | 11:53
2026 թվականի ավարտին Հայաստանում կգործեն 27 երիտասարդական միջավայրեր. ԿԳՄՍ նախարարի ուղերձը
Լավրովը փետրվարի 1-ին հանդիպելու է ԱՊՀ երկրների դեսպաններին, ավելի ուշ՝ ՀԱՊԿ երկրների խորհրդարանականներին
Քաղաքականություն
31.01.2024 | 21:15
ՌԴ արտգործնախարար Սերգեյ Լավրովը փետրվարի 1-ին աշխատանքային նախաճաշ կունենա երկրում հավատարմագրված ԱՊՀ անդամ երկրների դեսպանների հետ և կներկայացնի կազմակերպությունում Ռուսաստանի նախագահության առաջնահերթությունները։ Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է ՏԱՍՍ-ը։
«Փետրվարի 1-ին Մոսկվայում տեղի կունենա Ռուսաստանի արտաքին գործերի նախարարի ավանդական աշխատանքային նախաճաշը մեր երկրում հավատարմագրված ԱՊՀ անդամ երկրների դեսպանների հետ։Սպասվում է, որ հանդիպման ընթացում նախարարը կտեղեկացնի գործընկերներին միջազգային և տարածաշրջանային օրակարգի առանցքային հարցերի վերաբերյալ ՌԴ-ի մոտեցումների մասին, կամփոփի 2023 թվականին Համագործակցության շրջանակներում բազմակողմ փոխգործակցության արդյունքները և կուրվագծի այս տարի կազմակերպությունում Ռուսաստանի նախագահության առաջնահերթությունները»,- ասել է Զախարովան։
Բացի դրանից՝ նա հայտնել է, որ Լավրովը փետրվարին 7-ին էլ հանդիպում կունենա Հավաքական անվտանգության պայմանագրի կազմակերպության (ՀԱՊԿ) երկրների խորհրդարանականների հետ՝ քննարկելու կազմակերպության պատասխանատվության ոլորտում ստեղծված իրավիճակը։
«Փետրվարի 7-ին Մոսկվայում տեղի կունենա Ռուսաստանի արտգործնախարար Սերգեյ Լավրովի և ՀԱՊԿ անդամ երկրների խորհրդարանների հանձնաժողովների նախագահների հանդիպումը։ Կքննարկվեն միջազգային հարաբերությունների, պաշտպանության, անվտանգության հարցեր, ինչպես նաև հանդիպում Ռուսաստանի Դաշնությունում ՀԱՊԿ երկրների դեսպանների հետ։ Նախատեսվում է մտքեր փոխանակել կազմակերպության պատասխանատվության գոտում և հարակից շրջաններում տիրող իրավիճակի շուրջ»,- նշել է Զախարովան՝ հավելելով, որ քննարկվելու են միջազգային և տարածաշրջանային անվտանգության հարցեր։
Էմմա Չոբանյան
