Վաշինգտոնը կպատասխանի Հորդանանում ամերիկյան բազայի վրա հարձակմանը

ԱՄՆ-ը կպատասխանի Հորդանանում իր ռազմաբազայի վրա հարձակմանը, որի հետևանքով երեք ամերիկացի զինվոր է զոհվել։ Այս մասին լրագրողներին ասել է ԱՄՆ նախագահ Ջո Բայդենը, փոխանցում է DW-ի ռուսական ծառայությունը։ Նա  միաժամանակ ընդգծել է, որ Վաշինգտոնին պետք չէ «ավելի մեծ պատերազմ» Մերձավոր Արևելքում։ Հարցին՝ արդյո՞ք կարծում է, որ Իրանը պատասխանատու է հարձակման համար, Բայդենը նշել է․ «Այո՛, այն առումով, որ նրանք զենք են մատակարարում նրանց, ովքեր դա արել են»:

Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին մի փոքր ավելի է բացել փակագծերը։  «Շատ հնարավոր է, որ դուք տեսնեք բազմամակարդակ մոտեցում, ոչ թե ուղղակի մեկ գործողություն, այլ ըստ էության մի քանի գործողություն»,-ասել է նա լրագրողներին։

Ըստ Politico-ի՝ Բայդենը հանձնարարել է իր խորհրդականներին մի քանի տարբերակ ներկայացնել Հորդանանի բազայի վրա հարձակմանը ԱՄՆ պատասխանի վերաբերյալ։ Միևնույն ժամանակ նախագահը պայման է դրել, որ  Վաշինգտոնի պատասխանը չպետք է հանգեցնի Մերձավոր Արևելքում հակամարտության հետագա սրմանը։  ԱՄՆ Կոնգրեսում Հանրապետական ​​կուսակցության ներկայացուցիչները Բայդենի վարչակազմից պահանջում են կոշտ պատասխան տալ  բազայի վրա հարձակմանը։

Նշենք, որ անօդաչու թռչող սարքի հարվածը, որի հետևանքով զոհվել էր երեք ամերիկացի զինվորական և վիրավորվել ավելի քան 30 մարդ, տեղի էր ունեցել հունվարի 28-ին։ Սպիտակ տունը հարձակման մեջ մեղադրել էր Իրանի կողմից աջակցվող ծայրահեղական զինված խմբավորումներին, որոնք գործում են Սիրիայում ու Իրաքում։

Ավելի ուշ Պենտագոնը հայտարարել էր, որ միջադեպում «Քաթայբ Հեզբոլլահի» խմբավորման հետքն է տեսնում։ Իրանը պաշտոնապես հերքում իր մասնակցությունը ամերիկյան բազայի վրա հարձակմանը։