Հայտնի են դարձել ԱՄՆ-ի կողմից Թուրքիային F-16 կործանիչների վաճառքի պայմանները

Վստահելի դիվանագիտական աղբյուրները հունական ekathimerini-ին հայտնել են, որ Թուրքիայի կողմից ԱՄՆ-ից F-16 կործանիչների ձեռքբերումը կիրականացվի պայմանով, որ դրանք կօգտագործվեն միայն ՆԱՏՕ-ի դաշինքի նպատակների, այլ ոչ թե հունական կղզիների վրայով թռիչքների համար: Այս մասին ասվում է Կոնգրեսի չորս համապատասխան հանձնաժողովներին, Ներկայացուցիչների պալատին և Սենատին ուղղված ԱՄՆ Պետքարտուղարության գաղտնի նամակում, որը չի հրապարակվել։

Նամակում նշվել է, որ եթե այս պայմանը չկատարվի, ապա Պետքարտուղարությունն իր վրա կվերցնի խնդրի լուծումը, իսկ եթե հարցը չլուծվի, ապա F-16-երի ծրագիրը կդադարեցվի: Նման բան տեղի ունեցավ Անկարայի կողմից ռուսական C-400 համակարգերի գնման դեպքում, ինչը հանգեցրեց նրան, որ Թուրքիան դուրս մնաց F-35 ծրագրից, որտեղ նա հանդիսանում էր համարտադրող երկիր:

Լրատվամիջոցը նշում է, որ Հունաստանի կառավարությունը կցանկանար տեսնել նամակի բովանդակությունը, քանի որ այն ավելի համապարփակ համաձայնագրի մի մասն է: Այնուամենայնիվ, Աթենքում համոզմունքը, հիմնականում հիմնված Կոնգրեսի անդամների հավաստիացումների վրա, որոնք բարեկամաբար են տրամադրված Հունաստանին, այն է, որ նամակի ձևակերպումը, հավանաբար, գոհացուցիչ է:

Ըստ հրապարակման՝ ակնհայտ է, որ օգտագործված ձևակերպումն առանձնահատուկ նշանակություն ունի, քանի որ մի բան է վկայակոչել այն միջոցները, որոնք Պետքարտուղարությունը «կարող է ձեռնարկել» պայմանների խախտման դեպքում, մեկ այլ բան է՝ ասել, որ այն «կձեռնարկի» կոնկրետ միջոցներ: Ըստ լրատվամիջոցի՝ մնում է սպասել՝ արդյո՞ք այդ պայմանները կկատարվեն Անկարայի կողմից ոչ միայն հույն-թուրքական հարաբերությունների լարվածության նվազման ներկա փուլում, այլև ապագայում։

«Նույնքան պարզ է, որ Պետքարտուղարության կողմից առաջադրված պայմանները հիմնականում ներքաղաքական նպատակ ունեն, այն է՝ ստանալ ԱՄՆ Կոնգրեսի կողմից Թուրքիա F-16 արտահանման ծրագրի հաստատումը, որը նախկինում չափազանց թերահավատորեն էր վերաբերվում Թուրքիայի գործողություններին ավելի լայն շրջանակում՝ Արևելյան Միջերկրածովյան տարածաշրջանում և Ուկրաինայում»,- գրում է ekathimerini-ն։

Նշենք, որ ԱՄՆ Պետքարտուղարությունը Թուրքիային F-16-ի վաճառքին հավանություն է տվել Անկարայի կողմից ՆԱՏՕ-ին Շվեդիայի անդամակության հայտի վավերացումից հետո։

Էմմա Չոբանյան