15.01.2026 | 12:36
Նոր պատվաստանյութեր ենք ներդրել վերջին տարիներին. Ավանեսյան․ ՏԵՍԱՆՅՈՒԹ
Թուրքիայի ՊՆ նախկին ղեկավար Հուլուսի Աքարը Բաքվից սպառնացել է Հայաստանին
Քաղաքականություն
29.01.2024 | 15:53
Թուրքիայի նախկին ՊՆ ղեկավար, ներկայում պատգամավոր, Ազգային Մեծ ժողովի պաշտպանության կոմիտեի նախագահ Հուլուսի Աքարի գլխավորած թուրքական խորհրդարանական պատվիրակությունն այցով Բաքվում է։
Ադրբեջանական լրատվամիջոցների հաղորդմամբ՝ թուրքական պատվիրակությունը հարգանքի տուրք է մատուցել Հեյդար Ալիևի հիշատակին՝ այցելելով նրա գերեզման, ինչպես նաև՝ «Շեհիդների պուրակ»։
Այստեղ լրագրողների հետ զրույցում Աքարը հայտարարել է, որ Արցախի դեմ իրականացրած 44-օրյա պատերազմից հետո «Ադրբեջանն ու Թուրքիան զարգացնում են համագործակցությունը որպես «Մեկ ազգ, երկու պետություն», որպես «Մեկ բանակ, մեկ բռունցք և մեկ սիրտ» ու իրականացնում են անհրաժեշտ նախագծեր»։
Նշելով, որ Ադրբեջանը և Թուրքիան համատեղ զորավարժություններ են անցկացնում և սերտորեն համագործակցում են պաշտպանական արդյունաբերության ոլորտում, Աքարն ասել է.
«Մեր հիմնական նպատակը տարածաշրջանում խաղաղության, կայունության և համագործակցության ապահովումն է։ Այս տեսանկյունից մենք փորձում ենք ապահովել, որ Հայաստանին ուղղված Ադրբեջանի խաղաղության առաջարկը հնարավորինս շուտ ընդունվի Երևանի կողմից և հնարավորինս արագ կայունություն ապահովվի տարածաշրջանում»։ Թուրքիայի նախկին ՊՆ ղելավարը նաև կարծիք է հայտնել, թե որոշ երկրներ Հայաստանը ցանկանում են «պրոքսի պետություն» դարձնել և հերթական անգամ սպառնացել է Հայաստանին։
«Եթե Հայաստանը հետևի նրանց ասածին, կարող է հայտնվել նույն իրավիճակում, ինչ 44-օրյա պատերազմի ժամանակ, երբ ստացավ լուրջ հարված»,- հայտարարել է Հուլուսի Աքարը։
