Քաղաքականություն
26.01.2024 | 18:42
ԱՄՆ պետքարտուղարի Եվրոպայի ու Եվրասիայի հարցերով տեղակալ Ջեյմս Օ՛Բրայենը հայտարարել է, որ Վաշինգտոնն աջակցում է Եվրամիությանը Արևմտյան Բալկանների երկրների միջև տնտեսական ինտեգրման նոր նախագիծ սկսելու, ինչպես նաև Վրաստանի, Հայաստանի և Ադրբեջանի հետ համագործակցության ծրագրերում։ Այս մասին հայտնում է ադրբեջանական Թուրան գործակալության Վաշինգտոնի թղթակիցը։
Ելույթ ունենալով գերմանական Մարշալի հիմնադրամում՝ Օ՛Բրայենն ասել է, որ վերջին տասնամյակներում ի հայտ են եկել մի շարք պետություններ, որոնք ձգտում էին դեպի Եվրոպա, բայց չեն ունեցել հստակ ռազմավարություն։ Եղել են նաև այնպիսիք, որոնք «իրենց տեսնում էին Ռուսաստանի և ԱՄՆ-ի միջև։ Այս պատկերը նկատվում է Կասպից ծովի և նույնիսկ Կենտրոնական Ասիայի ափերից մինչև Ադրիատիկ»։
«Սա լուրջ խնդիր է մեր անվտանգության, ինչպես նաև այդ երկրների բնակիչների համար։ Այս մոխրագույն տարածությունը թույլ է տալիս ծաղկել այն քաղաքական գործիչներին, որոնք սիրում են կանոններից դուրս լինել։ Նրանք կարող են խաղալ բոլորի հետ, բայց առանց կանոնների։ Այս համատեքստում լավ նորություն է, որ ԵՄ-ն սկսում է բանակցություններ այդ երկրների հետ՝ ակտիվացնելու իր համագործակցությունը նրանց հետ։ ԱՄՆ-ը վճռականորեն աջակցում է դրան և բարեփոխումներին, որոնք այս երկրներին անհրաժեշտ են՝ միասնական շուկայի և Եվրամիության շրջանակում ապագա գտնելու համար»,- ասել է պետքարտուղարի տեղակալը։
Նրա խոսքով՝ Կենտրոնական Ասիայի երկրները փնտրում են Ռուսաստանին շրջանցող առևտրային ուղիներ և ենթակառուցվածքներ՝ Կասպից ծովով, Ադրբեջանով, Վրաստանով, հնարավոր է՝ Հայաստանի և Թուրքիայի տարածքով։ Առևտրի հսկայական ծավալներ կանցնեն այս ուղիներով, ներառյալ՝ հանքանյութերի, հացահատիկի և այլ ապրանքների համաշխարհային առևտրի մեծ մասը: Ամերիկացի պաշտոնյան նշել է, որ Վերակառուցման և զարգացման եվրոպական բանկը հաջորդ շաբաթ Բրյուսելում կազմակերպելու է այս առևտրային նախագծերի ֆինանսավորմանը համաժողով։
Ուկրաինայի դեմ Ռուսաստանի ագրեսիայի վերաբերյալ Օ՛Բրայենն ասել է, որ աշխարհն ավելի ապահով կլիներ, եթե աջակցեր Ուկրաինային: Վաշինգտոնը կարծում է, որ մինչև 2024 թվականի ավարտը Ուկրաինան ավելի կուժեղանա և կկարողանա որոշել իր ապագան, ուստի ԱՄՆ-ն օգնում է Ուկրաինային հաղթել։
Էմմա Չոբանյան
