Գերմանիայի ԱԳՆ-ն սոցցանցերում ՌԴ-ի ապատեղեկատվության արշավ է բացահայտել

Գերմանական Der Spiegel-ը հայտնում է, որ երկրի ԱԳ նախարարությունը բացահայտել է ռուսական ապատեղեկատվության քարոզարշավը Իլոն Մասկի X սոցիալական ցանցում, գրում է DW-ի ռուսական ծառայությունը։

Լրատվամիջոցը, վկայակոչելով ԱԳՆ-ի ներքին զեկույցը, գրում է, որ այդ արշավի նպատակն է հասարակության մեջ մեծացնել դժգոհությունը Գերմանիայի ներկայիս կոալիցիոն կառավարության նկատմամբ և խաթարել Ուկրաինային հետագա աջակցությունը։

Նշվում է, որ ԱԳՆ-ն փորձագետներին հանձնարարել է հատուկ ծրագրի միջոցով վերլուծել X-ի հաղորդագրությունները, ինչի արդյունքում հայտնաբերվել է գերմանալեզու բովանդակություն տարածող կեղծ հաշիվների լայնածավալ ցանց: Դեկտեմբերի 20-ից հունվարի 20-ը ընկած ժամանակահատվածում ավելի քան 50,000 նման էջեր տեղադրել են, ընդհանուր առմամբ, ավելի քան մեկ միլիոն թվիթ գերմաներեն՝ հաճախ մեղադրելով դաշնային կառավարությանը Ուկրաինային աջակցելու համար սեփական բնակչությանը, իբր, անտեսելու մեջ:

Լրատվամիջոցը գրում է, որ խոսքն «ապատեղեկատվության համակարգված ռուսական արշավի մասին է»։

Գերմանիայի ԱԳՆ-ն տվյալների վերլուծաբանների օգնությամբ որոշ ժամանակ վերահսկում է սոցցանցերում արտաքին քաղաքականության թեմաներով բանավեճերը՝ փորձելով բացահայտել օտարերկրյա ազդեցության փորձերը։

ԱԳՆ պաշտոնական ներկայացուցիչը Der Spiegel-ին տված հարցազրույցում ասել է, որ «ապատեղեկատվությունը դարձել է համաշխարհային սպառնալիքի գործոն»։

«Դա միտումնավոր օգտագործվում է նրանց կողմից, որոնք չեն կիսում մեր արժեքները՝ ապակայունացնելու ամբողջ հասարակությունները՝ ոչ միայն արևմտյան ժողովրդավարական երկրներում, այլ ամենուր»,- հավելել է պաշտոնյան։

Էմմա Չոբանյան