14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ռուսաստանի մարզերում LTE բջջային ինտերնետը հինգ գիշերով կանջատվի
Քաղաքականություն
26.01.2024 | 16:21
Ռուսաստանի երկու մարզերում՝ Պսկովում և Նովգորոդում, մի քանի գիշեր անընդմեջ LTE բջջային ինտերնետը կանջատվի։ Որոշումն ընդունվել է «հաղորդիչ սարքավորումների ռադիոհաճախականության սպեկտրի վերակազմավորման տեխնիկական աշխատանքների հետ կապված», Telegram-ում հայտնել է Պսկովի մարզի նահանգապետ Միխայիլ Վեդյորնիկովը։
Նրա խոսքով՝ հունվարի 25-ից 30-ը, ժամը 23:00-06:00-ն տարածաշրջանում չի գործի «բոլոր հեռահաղորդակցության օպերատորների» LTE ստանդարտի շարժական ինտերնետը։
«3G ձևաչափով ինտերնետը կաշխատի, բայց այն հնացել է, իսկ շատ տարածքներում այն պարզապես գոյություն չունի, հետևաբար, կլինեն խափանումներ: Հաշվի առեք այս տեղեկատվությունը»,- նշել է Վեդյորնիկովը:
Նա բացատրել է, որ, ի թիվս այլ բաների, «գիշերը դժվար կլինի տաքսի կանչել բջջային հավելվածների միջոցով և օգտվել բանկոմատներից»:
Նման տեղեկություն են տարածել նաև Նովգորոդի մարզի իշխանությունները։ Մարզի թվային զարգացման տարածաշրջանային նախարարությունը սոցցանցերի միջոցով հայտարարել է, որ հունվարի 25-ից 30-ը ամեն գիշեր, ժամը 23:00-ից մինչև 06:00-ն, տարածաշրջանում կանջատվի 4G ստանդարտի LTE բջջային ինտերնետը՝ տեխնիկական պատճառով հեռարձակման հաճախականությունների վերակարգավորման աշխատանքներով պայնանավորված։
Forbes-ը, հղում անելով հեռահաղորդակցության շուկայում իր աղբյուրին, գրում է, որ ցանցի պարամետրերը սովորաբար կարգավորվում են առանց ինտերնետն անջատելու։
«Միայն այն դեպքում, երբ տեղի է ունենում սարքավորումների զանգվածային փոխարինում, օրինակ, այլ արտադրողի սարքավորումներով, միայն նման աշխատանքը կարող է պահանջել ցանցի անջատում»,- ասել է պարբերականի զրուցակիցը։
Նա վստահություն է հայտնել, որ շարժական ինտերնետի անջատման պատճառն իշխանությունների հաղորդածը չէ։
«Քանի որ դժվար է հնարավոր համարել, որ տարածաշրջանի բոլոր օպերատորները միաժամանակ սկսեն սարքավորումների փոխարինումը, պատճառը կարող է լինել այլ, ոչ թե այն, ինչ պաշտոնապես ասվում է»,- բացատրել է նա:
