31.05.2026 | 13:33
Օդի ջերմաստիճանը կբարձրանա 3-4 աստիճանով
Քրեակատարողական ծառայության պետ Ամբակում Գրիգորյանը ներկայացրել է կենտրոնական մարմնի երկու ստորաբաժանումների ղեկավարներին
25.01.2024 | 16:48
Այսօր՝ հունվարի 25-ին, Հայաստանի Հանրապետության արդարադատության նախարարության քրեակատարողական ծառայության պետ, արդարադատության գնդապետ Ամբակում Գրիգորյանը Ծառայության անձնակազմին է ներկայացրել կենտրոնական մարմնի նորաստեղծ օպերատիվ վարչության պետ Էդիկ Անդրյանին․ տեղեկացնում են ՀՀ ՔԿԾ-ից։
«Ծառայության պետն իր խոսքում կարևորել է Էդիկ Անդրյանի անցած աշխատանքային ուղին, օպերատիվ գործունեության ոլորտում ունեցած հարուստ փորձը՝ հույս հայտնելով, որ վերջինս պատշաճ և արդյունավետ կիրականացնի իրեն վստահված աշխատանքները։
Ամբակում Գրիգորյանը ներկայացրել է նաև կենտրոնական մարմնի ներքին անվտանգության բաժնի պետ, արդարադատության գնդապետ Հայկ Թումանյանին, մաղթել անփորձանք ծառայություն։ Իրենց հերթին Էդիկ Անդրյանն ու Հայկ Թումանյանը նշել են, որ ջանք ու եռանդ չեն խնայի Ծառայության աշխատանքների բնականոն ընթացքի և դրական արդյունքների ապահովման համար։
Ավարտին քննարկվել են Ծառայության ամենօրյա գործունեությանն առնչվող խնդիրները, տրվել են կոնկրետ հանձնարարականներ»,- ասված է հաղորդագրությունում։
Հիշեցնենք, որ արդարադատության նախարար Գրիգոր Մինասյանի հրամանով դադարեցվել էր Քրեակատարողական ծառայության կենտրոնական մարմնի, ինչպես նաև բոլոր քրեակատարողական հիմնարկների օպերատիվ բաժինների գործունեությունը։ Փոխարենը ստեղծվել է կենտրոնական մարմնի օպերատիվ վարչություն՝ քրեակատարողական հիմնարկներում տեղակայված տարածքային բաժիններով և բաժանմունքներով։
