15.01.2026 | 12:36
Նոր պատվաստանյութեր ենք ներդրել վերջին տարիներին. Ավանեսյան․ ՏԵՍԱՆՅՈՒԹ
Պաշտոնական Բաքուն դիտարկում է Եվրոպայի խորհրդից Ադրբեջանի դուրս գալու ընթացակարգը՝ ի պատասխան ԵԽԽՎ-ի որոշման
Քաղաքականություն
25.01.2024 | 17:26
Պաշտոնական Բաքուն դեռևս չի արձագանքել ԵԽԽՎ-ի նախօրեին կայացրած որոշմանը, որով չի վավերացվել Ադրբեջանի պատվիրակության լիազորությունները։ Այսպիսով, Ադբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ իր կանոնակարգային պարտավորությունները կատարելու դեպքում։
Այս որոշման ընդունման առնչությամբ ադրբեջանական իշխանական լրատվամիջոցները գրում են, որ պաշտոնական Բաքուն մտադիր է համարժեք պատասխան տալ։
Մասնավորապես, ըստ APA գործակալության, չնայած այն հանգամանքին, որ ԵԽԽՎ-ի երեկվա նիստում նշվել է, որ ադրբեջանական պատվիրակության լիազորությունների սահմանափակումը չի նշանակում Ադրբեջանի մասնակցության ավարտ Եվրոպայի խորհրդի այլ կառույցներում, Բաքվի դիրքորոշումն այլ է։
«Ստացված տեղեկությունների համաձայն՝ Ադրբեջանը մտադիր չէ համակերպվել այս անարդար և կողմնակալ վերաբերմունքի հետ, պաշտոնական Բաքուն ներկայում քննարկում է ոչ միայն ԵԽԽՎ-ից, այլև ամբողջությամբ Եվրախորհրդից դուրս գալու ընթացակարգը։ Ադրբեջանը կարող է նաև հրաժարվել Մարդու իրավունքների եվրոպական դատարանի իրավազորության ճանաչումից»,- գրում է լրատվամիջոցը։
Հիշեցնենք, որ ԵԽԽՎ-ի որոշման ընդունումից առաջ ադրբեջանական լրատվամիջոցները գրում էին, որ Բաքուն կլքի կառույցը։
Էմմա Չոբանյան
