Ուկրաինան մեկ շաբաթվա ընթացքում չորրորդ անգամ ԱԹՍ-ով հարձակվել է ՌԴ-ում նավթագազային օբյեկտի վրա

Հունվարի 25-ի գիշերը հրդեհ է բռնկվել Տուապսեի նավթավերամշակման գործարանի տարածքում։ Վակուումային սարքավորումն է բռնկվել, հայտնել է Տուապսե շրջանի ղեկավար Սերգեյ Բոյկոն, հայտնում է The Moscow Times-ը։

Նա չի նշել հրդեհի պատճառները և տեղի բնակիչներին հորդորել է դեպքի վայրից տեսանյութեր չհրապարակել՝ «անբարենպաստ հետևանքներից խուսափելու համար»։

Հրդեհը նավթավերամշակման գործարանում բռնկվել է անօդաչու թռչող սարքի հարվածի հետևանքով, գրում է «Осторожно, новости» Telegram-ալիքը։ Տեղի բնակիչների խոսքով՝ պայթյունից առաջ քաղաքում օդային հարվածի տագնապ է հնչել։

Սոչիի օդանավակայանում էլ սահմանվել է «Կարպետ» պլան, որը նախատեսում է օդային տարածքի փակում՝ դրանում չպարզված օբյեկտի հայտնվելու պատճառով։

Միջադեպից հետո իրավապահները փակել են նավթավերամշակման գործարանի շրջակայքը։

Կրասնոդարի երկրամասի օպերատիվ շտաբից հայտնել են, որ, ըստ նախնական տեղեկությունների, զոհեր և վիրավորներ չկան։

«Տեղում աշխատում են օպերատիվ և հատուկ ծառայությունները՝ դեպքի բոլոր հանգամանքները պարզելու համար»,- ընդգծել են շտաբից։

Հրդեհի տարածքը կազմել է մոտ 200 քմ։ Մի քանի ժամվա ընթացքում այն տեղայնացվել և մարվել է։

Սա վերջին շաբաթվա ընթացքում ռուսական նավթագազային ենթակառուցվածքների վրա անօդաչու թռչող սարքի հարձակման չորրորդ դեպքն է։ Մինչ այս՝ հունվարի 18-ին, հարձակման էր ենթարկվել Լենինգրադի մարզի նավթային տերմինալը, հունվարի 19-ին անօդաչու թռչող սարքը հարձակվել էր Բրյանսկի շրջանի Կլինցի քաղաքում «Ռոսնեֆտ»-ին պատկանող նավթային պահեստի վրա, իսկ հունվարի 21-ին անօդաչու թռչող սարքի ժամանումը հանգեցրել էր Լենինգրադի մարզի Ուստ-Լուգա ծովային նավահանգստի «ՆՈՎԱՏԵԿ» տերմինալում հրդեհի։

Ուկրաինայի զինված ուժերն անցել են ռուսական ենթակառուցվածքների ոչնչացման նոր մարտավարության։ Օկուպացված տարածքներում զուտ ռազմական թիրախները վերացնելու փոխարեն՝ ուկրաինական բանակը որոշել է հարվածներ հասցնել ինչպես խաղաղ բնակչությանը, այնպես էլ ռազմարդյունաբերական համալիրին սպասարկող օբյեկտներին, գրում է Bild-ը։