29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Հութիները հարձակվել են Պենտագոնի համար բեռներ տեղափոխող ամերիկյան երկու նավերի վրա
Քաղաքականություն
25.01.2024 | 12:40
ԱՄՆ դրոշի ներքո նավարկող երկու նավեր, որոնք բեռներ էին տեղափոխում ԱՄՆ Պաշտպանության նախարարության և Պետքարտուղարության համար, չորեքշաբթի հութիների հարձակմանն են ենթարկվել։ Այս մասին հայտնում է VOA-ն՝ հղում անելով Պենտագոնում աղբյուրներին։
Նշվում է, որ ԱՄՆ ռազմածովային ուժերը որսացել են հրթիռներից մի քանիսը:
Maersk Detroit և Maersk Chesapeake կոնտեյներներ տեղափոխող նավերի վրա հարձակումներն ավելի են մեծացնում կենսական նշանակություն ունեցող Բաբ էլ-Մանդեբ նեղուցով բեռնափոխադրումների ռիսկերը: ԱՄՆ-ը և Մեծ Բրիտանիան մի շարք ավիահարվածներ են հասցրել՝ փորձելով դադարեցնել հարձակումները։
Մինչ այդ, Կատարը՝ հեղուկ բնական գազի աշխարհի խոշորագույն արտահանողներից մեկը, զգուշացրել է, որ իր մատակարարումները տուժում են հութիների շարունակվող հարձակումներից՝ Գազայի հատվածում ՀԱՄԱՍ-ի դեմ Իսրայելի պատերազմի պատճառով:
ԱՄՆ կենտրոնական հրամանատարությունը հարձակման մեջ մեղադրել է հութիներին՝ ասելով, որ նրանք արձակել են «երեք հականավային բալիստիկ հրթիռներ»։
«Մեկ հրթիռ ընկել է ծովը։ Մյուս երկու հրթիռները հաջողությամբ որսացել և խոցվել են USS Gravely-ի՝ Arleigh Burke դասի կործանիչի կողմից, որը զինված է կառավարվող հրթիռներով»,- ասվում է հաղորդագրության մեջ։
Հութիները, որոնք նոյեմբերից նմանատիպ հարձակումներ են իրականացնում, հայտարարել են, որ մտադիր են շարունակել հարձակումներն Իսրայելին աջակցող երկրների նավերի վրա:
