14.12.2024 | 19:57
Ինչ իրավիճակ է ճանապարհներին 19։35-ի դրությամբ
Կրեմլը չի հանդգնել քննադատել Թուրքիային ՆԱՏՕ-ին Շվեդիայի անդամակցության հաստատման համար․ MT
Քաղաքականություն
24.01.2024 | 18:07
ՆԱՏՕ-ին Շվեդիայի անդամակցությանը հավանություն տալու՝ Թուրքիայի խորհրդարանի որոշումը բացատրվում է դաշնակիցների հանդեպ Անկարայի պարտավորություններով։ Նման կարծիք է հայտնել ՌԴ նախագահի մամուլի քարտուղար Դմիտրի Պեսկովը հունվարի 24-ին կայացած ճեպազրույցում, փոխանցում է The Moscow Times-ը։
«Թուրքիան դեռևս Հյուսիսատլանտյան դաշինքի անդամ է։ Սա միանգամայն ակնհայտ փաստ է, [Անկարան] ունի իր պարտավորությունները, ունի իր բանակցային գործընթացներն այս դաշինքի շուրջ»,- ասել է Պեսկովը։
Կրեմլի խոսնակը հավելել է, որ դա «Թուրքիայի ինքնիշխան որոշումն է»։
Հիշեցնենք, որ Շվեդիան և Ֆինլանդիան, հրաժարվել են ռազմական բլոկներին մասնակցությունից ձեռնպահ մնալու իրենց վաղեմի քաղաքականությունից և Ուկրաինա Ռուսաստանի ներխուժումից հետո դիմել են ՆԱՏՕ-ին անդամակցելու խնդրանքով:
2022 թվականի հունիսին Թուրքիան և սկանդինավյան երկրները հուշագիր ստորագրեցին՝ լուծելու Անկարայի մտահոգությունները՝ ճանապարհ հարթելով հետագայում նրանց դաշինքին անդամակցելու համար։ Սակայն դրանից հետո Անկարան հայտարարեց, որ Շվեդիան նախ պետք է ավելի հստակ դիրքորոշում որդեգրի Քուրդիստանի աշխատավորական կուսակցության ներկայացուցիչների առումով, որը Թուրքիան համարում է ահաբեկչական կազմակերպություն։
2023 թվականի հունիսին ՆԱՏՕ-ի գլխավոր քարտուղար Յենս Ստոլտենբերգը Թուրքիայի նախագահ Ռեջեփ Թայիփ Էրդողանի հետ հանդիպումից հետո հայտարարեց, որ Շվեդիան կատարել է ՆԱՏՕ-ին անդամակցելու պայմանները, որոնք Թուրքիան առաջադրել էր, և կարող է միանալ դաշինքին։
Հունվարի 23-ին Թուրքիայի խորհրդարանը ձայների ճնշող մեծամասնությամբ հավանություն է տվել Շվեդիայի անդամակցությանը ՆԱՏՕ-ին (287 կողմ, 55 դեմ)։ Սպասվում է, որ Էրդողանը վավերացման փաստաթուղթը կստորագրի մոտ օրերս։
