«Ո՛չ պարոն Ծառուկյանը, ո՛չ Էդիկը իմ վրա ձեռք չեն բարձրացրել»․ Վյաչեսլավ Հարությունյան․ ՏԵՍԱՆՅՈՒԹ

Գագիկ Ծառուկյանի անվտանգության պետ Էդուարդ Բաբայանի գործով տուժող ճանաչված Վյաչեսլավ Հարությունովը պնդում է՝ Գագիկ Ծառուկյանն ու իր թիկնազորի պետը ներկա չեն գնտվել այն ընդհարմանը, որը տեղի է ունեցել իր մասնակցությամբ, և այդ մասին լուրերը աբսուրդային է համարում, քանի որ նրանք երկուսն էլ այդ նույն ժամանակահատվածում եղել են այլ տեղում, ինչի մասին նաև նախաքննական մարմնին է հայտնել։

«Նման բան չի եղել, մենք պարոն Ծառուկյանի հետ լավ հարաբերությունների մեջ ենք, և դուք դրանում կհամոզվեք մոտ ապագայում, երբ իմ բալիկը կվերադառնա և կբարձրացնի մեր դրոշը։ Ես խնդրում եմ և այդ խնդրանքով դիմում եմ նաև պարոն Փաշինյանին․ պարո՛ն Փաշինյան, այս հարցին ուշադրություն դարձրեք և այն խեղճ տղային բաց թողեք․ ո՛չ պարոն Ծառուկյանը, ո՛չ Էդիկը իմ վրա ձեռք չեն բարձրացրել»,-այսօր հրավիրված մամուլի ասուլիսի ժամանակ ասաց Հարությունյանը։

Վերջինս նշեց, որ իր կողմից նման հայտարություններ չեն եղել, ինքը ցուցմունք է տվել, որ ընկել է։

Ըստ նրա՝  8։30 ընդունվել է հիվանդանոց ու մինչեւ 12։30 ոչ մի հայտարարություն չի եղել։

Վյաչեսլավ Հարությունովը  նաև նշեց, որ այս դեպքից հետո դիմել է կնոջը՝ նրան խնդրելով լրագրողներին հայտնել, որ իրեն ոչ ոք ծեծի չի ենթարկել, սակայն, արդյունքում ստացվեց այնպես, որ լրագրողների ասածները վերագրվեցին իրեն։

Հարությունյանի պաշտպաններից Վահագն Հակոբյանն էլ նկատեց, որ այս գործով դատաբժշկական փորձաքննության արդյունքները դեռ ամբողջական չեն, թերի են, իսկ այն տեսագրությունը, որը տարածվել է՝ վկայում է, որ իր վստահորդը գտնվել է ներարկված հոգեմետ դեղերի ազդեցության տակ։

«Իմ վստահորդի ապրումներն ու տեսագրությունը վկայում են թմրանյութերի ազդեցության մասին»,-ասաց պաշտպանը։

Մանրամասները՝ տեսանյութում։