Հաշտարարության ինստիտուտը զարգացնելու համար բոլոր նախադրյալները ստեղծվել են․ ՀՀ ԱՆ

Հունվարի 21-ին՝ հաշտարարության միջազգային օրվա առթիվ՝ «Օրենսդրության զարգացման կենտրոն» հիմնադրամի տնօրեն Տիգրան Դադունցի մասնակցությամբ, տեղի է ունեցել միջոցառում, որի նպատակն էր մասնագիտական հանրույթի հետ քննարկել հաշտարարության կարևորությունն ու այն Հայաստանում զարգացած մշակույթ դարձնելու անհրաժեշտությունը․ տեղեկացնում են ՀՀ ԱՆ-ից։

Տիգրան Դադունցն իր խոսքում նշել է, որ այս ուղղության զարգացումը Հայաստանում քաղաքական առաջնահերթություն է: Այդ իսկ պատճառով հաշտարարության ոլորտի զարգացմանը կարևոր տեղ հատկացվեց Կառավարության ծրագրով ու Դատական և իրավական բարեփոխումների ռազմավարությամբ: Այս համատեքստում Արդարադատության նախարարության կողմից վերջին 2 տարիների ընթացքում լայնածավալ բարեփոխումներ են կատարվել հաշտարարության ոլորտը վերակենդանացնելու համար: Մատնանշվել է ընտանեկան գործերով պարտադիր հաշտարարության, առցանց հաշտարարության ինստիտուտների ներդրումը, հաշտարարների խրախուսման, e-mediation հարթակի ստեղծան, ինչպես նաև նոր հաշտարարների որակավորման և ոլորտի նկատմամբ աննախադեպ հետաքրքրվածության մասին: Տիգրան Դադունցը այս համատեքստում կարևորել է նաև նոր ստեղծված Արբիտրաժի և հաշտարարության կենտրոնի դերը, հույս ունենալով, որ կենտրոնի առաքելությունը միտված կլինի արբիտրաժին զուգահեռ նաև հաշտարարության զարգացմանը:

Արբիտրաժի և հաշտարարության հայաստանյան կենտրոնի տնօրեն և գլխավոր քարտուղար Տաթևիկ Մատինյանն իր ելույթում կարևորել է այն հանգամանքը, որ այլ առաջատար երկրների շարքում՝ այսօր նաև Հայաստանն է նշում Հաշտարարների օրը, ինչը ուղջունելի է։ Միջոցառման ընթացքում ներկայացվել են նաև AMCA-ի հաշտարարության կանոններն ու Կենտրոնի հաշտարարների ցանկը։ Միջոցառմանը ներկա էին, հաշտարարներ, փաստաբաններ, դատավորներ, ոլորտի այլ ներկայացուցիչներ։