ՌԴ-ն պատրաստ է «առավելագույն հնարավոր օգնությունը ցուցաբերել» Հայաստանի և Ադրբեջանի միջև խաղաղության հասնելու համար․ Կոպիրկին

Ռուսաստանը պատրաստ է առավելագույն հնարավոր օգնությունը ցուցաբերել Հայաստանի և Ադրբեջանի միջև խաղաղության հասնելու համար։ ՌԻԱ Նովոստիի հետ զրույցում այս մասին հայտարարել է ՀՀ-ում ՌԴ դեսպան Սերգեյ Կոպիրկինը։

«Ռուսական կողմն աշխատել է շատ ակտիվ, համառ, հետևողական և շարունակում է աշխատել այս ուղղությամբ, ինչի մասին են վկայում մեր գործողությունները։ Չեմ էլ թվարկի, թե ինչ է արվել ռուսական կողմի նախաձեռնությամբ։ Այս առումով, ես ուզում եմ ասել, որ Ռուսաստանը հաստատակամորեն հավատարիմ է մնում այս գործընթացին առավելագույն հնարավոր աջակցությունը ցուցաբերելուն, Հայաստանի և Ադրբեջանի միջև իսկապես կայուն, արդար խաղաղ կարգավորմանը հասնելուն»,- ասել է Կոպիրկինը։

Նա նշել է, թե Մոսկվան շահագրգռված է տարածաշրջանում կայուն խաղաղությամբ։

«Մենք աջակցում ենք հարաբերությունների կարգավորմանը, և Ռուսաստանը միշտ ընդգծել է այդ ուղղությամբ աշխատելու պատրաստակամությունը բոլոր ասպեկտներում՝ կլինի դա խաղաղության պայմանագրի կնքում, Հայաստանի և Ադրբեջանի միջև սահմանի դելիմիտացիա ու դեմարկացիա, վստահության ամրապնդման միջոցառումների մշակում, այդ թվում՝ քաղաքացիական հասարակության միջոցով շփումները, հաղորդակցությունների բացում»,- ասել ռուսաստանցի դիվանագետը։

Նա հավելել է, որ համապատասխան եռակողմ կառույցներ են ստեղծվել, և դրանցում ՌԴ-ն ակտիվ մասնակցում է։

«Կրկնում եմ՝ Ռուսաստանը վճռական է տրամադրված՝ ցուցաբերելու առավելագույն հնարավոր օժանդակությունը գործընթացին։ Իհարկե, դա կողմերի որոշելիքն է, դա նրանց ինքնիշխան խնդիրն է։ Հարավային Կովկասը մեզ համար շատ կարևոր տարածաշրջան է, և մեր կենսական շահերից է բխում, որ տարածաշրջանը լինի խաղաղ, կայուն և բարգավաճ»,-հայտարարել է Սերգեյ Կոպիրկինը։

Էմմա Չոբանյան