29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Ռուսական աղբյուրները փորձում են ներկայացնել, թե Հայաստանը զղջում է ՌԴ-ից հեռանալու համար․ ISW-ի զեկույցը
Քաղաքականություն
19.01.2024 | 14:19
Պատերազմի ուսումնասիրության ամերիկյան ինստիտուտն (ISW) իր զեկույցում անդրադառնում է Հայաստանի ու Ադրբեջանի հարաբերությունների կարգավորման գործընթացին և դրանում ՌԴ-ի դերին։
Մասնավորապես, նշվում է, որ ռուսական աղբյուրները փորձում են ներկայացնել, որ Հայաստանը զղջում է Ռուսաստանից հեռանալու իր «սխալների» համար, միաժամանակ, Հայաստանի և Ադրբեջանի միջև Ռուսաստանի գլխավորած խաղաղության բանակցությունները համարելով ավելի «խոստումնալից», քան Արևմուտքի ջանքերը:
«Ռուսաստանի արտաքին գործերի նախարար Սերգեյ Լավրովը հունվարի 18-ին հայտարարել է, որ արևմտյան խորհուրդները խոչընդոտում են Հայաստան-Ադրբեջան հարաբերությունների կարգավորմանը և պնդել, որ Ռուսաստանի գլխավորած բանակցությունները «խոստումնալից» են»,- ասվում է զեկույցում։
Նշվում է նաև, որ ՌԴ ԱԳՆ-ն հունվարի 17-ին հայտնել էր, որ փոխարտգործնախարար Միխայիլ Գալուզինը հանդիպել է Ռուսաստանում Հայաստանի դեսպան Վաղարշակ Հարությունյանի հետ՝ քննարկելու հայ-ադրբեջանական հարաբերությունների կարգավորման և ռուս-հայ-ադրբեջանական եռակողմ բանակցային ձևաչափի վերածնունդը։
«Ռուսական ռազմական բլոգերները պնդում են, թե հանդիպումը ցույց է տալիս, որ Հայաստանի վարչապետ Նիկոլ Փաշինյանը պատարստ է «խոնարհվել» Մոսկվայի առաջ, թեպետ բլոգերներից մեկն էլ զգուշացրել է, որ Ռուսաստանի ղեկավարած բանակցությունների նկատմամբ Հայաստանի նոր հետաքրքրությունը կարող է «դիվանագիտական ծուղակ» լինել»,- գրում է ISW-ն։
Էմմա Չոբանյան
