28.04.2026 | 23:24
Երևանում երթևեկության փոփոխություն կկատարվի
Թուրքիան սկսել է կրճատել երկակի նշանակության ապրանքների մատակարարումները Ռուսաստան. Forbes
Քաղաքականություն
19.01.2024 | 21:14
2023 թվականի հոկտեմբերին և նոյեմբերին Թուրքիան սկսել է կրճատել Ռուսաստան երկակի նշանակության ապրանքների մատակարարումները, որոնք կարող են օգտագործվել ռազմական կարիքների համար։ Forbes-ը նման եզրակացության է եկել Թուրքիայի վիճակագրության ինստիտուտի տվյալները ուսումնասիրելուց հետո։
Աղբյուրը նշում է, որ անցյալ տարվա վերջին մատակարարումների նվազումը տեղի է ունեցել ԱՄՆ դիրքորոշման ֆոնին, որը պահանջում է պատժամիջոցների պահպանում առևտրային և ֆինանսական գործարքներում։
Forbes-ի վերլուծության համաձայն՝ 2023 թվականի նոյեմբերին երկակի նշանակության ապրանքների արժեքը նվազել է մինչև 8,4 միլիոն դոլար՝ 2022 թվականի օգոստոսից ի վեր ամենացածր մակարդակը։ Ըստ հրապարակման՝ անկումը չի կարող բացատրվել սեզոնայնությամբ, քանի որ 2021-2022 թվականներին Ռուսաստան ապրանքների այս խմբի արտահանման անկում չի գրանցվել։
«Էլեկտրական սխեմաների անջատման կամ պաշտպանության, ինչպես նաև էլեկտրական սխեմաներին միացնելու համար» կատեգորիայի ապրանքների արտահանումը Ռուսաստան սկսել է նվազել անցյալ տարվա սեպտեմբերից։ Այս կատեգորիան, ըստ Forbes-ի, կազմում է ցուցակից ապրանքների մատակարարումների ընդհանուր արժեքի 39%-ը։
Պլեխանովի անվան ռուսական տնտեսագիտական համալսարանի միջազգային բիզնեսի և մաքսային հարցերի ամբիոնի ավագ դասախոս Օլեգ Իվանովը նշել է, որ Ռուսաստանը կարող է վերակողմնորոշվել դեպի Չինաստանից մատակարարումներ: Փորձագետի կողմից վկայակոչված Comtrade-ի տվյալների համաձայն՝ այս ապրանքախմբի Չինաստանից Ռուսաստան արտահանումն աճել է 2023 թվականի հուլիսին, իսկ սեպտեմբերից աճել է Հոնկոնգից մատակարարումները։
