08.09.2026 | 21:22
ՊՆ ՌՈ պետ Արամ Հովհաննիսյանն անցկացրել է ստուգատես
1800 ծնունդ՝ մեկ տարում. «Մարգարյանի ծննդատան» նոր տնօրենը կենտրոնի բարեփոխման ծրագրեր ունի. ՏԵՍԱՆՅՈՒԹ
17.01.2024 | 20:02
Մաշտոցի պողոտայի և Արամի փողոցի խաչմերուկում Խորհրդային Հայաստանի կառավարության համար նախատեսված շենքի փոխարեն ծննդատուն կառուցվեց, որտեղ արդեն գրեթե 9 տասնամյակ նոր կյանքեր են լույս աշխարհ գալիս։ Մոր և մանկան առողջության պահպանման գիտահետազոտական կենտրոնը հասարակության հիշողություններում շարունակում է մնալ որպես «Մարգարյանի ծննդատուն»՝ ի պատիվ պրոֆեսոր Պարթև Մարգարյանի։ Շուրջ 1 ամիս առաջ կենտրոնի տնօրեն նշանակված Դավիթ Մելիք-Նուբարյանն ասում է՝ ծննդատունը թեև մեծ աշխատանք է կատարում, սակայն ժամանակի հետ բարեփոխումների անհրաժեշտություն է առաջացել։
2023-ի ընթացքում այստեղ 1800-ից ավելի ծնունդ է սպասարկվել։ Ըստ Մելիք-Նուբարյանի՝ այս ցուցանիշը նշանակում է, որ կենտրոնն օրական միջինում հինգ ծնունդ է ընդունում։ Տնօրենի խոսքով՝ սա լավ ցուցանիշ է, եթե հաշվի առնենք այն հանգամանքը, որ ծնունդների թիվը Հայաստանում չի ավելանում։
Մոր և մանկան առողջության պահպանման գիտահետազոտական կենտրոնն առաջինն էր, որ Հայաստանում հաջողությամբ իրականացրեց արտամարմնային բեղմնավորում և եռյակ ծնվեց։ Դավիթ Մելիք-Նուբարյանը շեշտում է՝ ծննդատանը դրական էմոցիաներ ապրելու առիթները շատ են, բայց մեծ է նաև պատասխանատվությունը ծննդկանի և նորածնի առողջության համար։
Կենտրոնն ունի 6 բաժանմունք։ Factor TV-ի նկարահանող խումբը Դավիթ Մելիք-Նուբարյանի հետ շրջեց որոշ բաժանմունքներով։ Սաղմնաբանական լաբորատորիայի բժիշկ, սաղմնաբան Անժելա Հարությունյանը մեր նկարահանման ընթացքում իրականացնում էր արտամարմնային բեղմնավորման համար նախատեսված հերթական փուլը։
Վաղաժամ ծնված կամ առողջական խնդիրներ ունեցող փոքրիկները տեղափոխվում են նորածինների վերակենդանացման բաժանմունք։ Այս պահին բաժանմունքում 25 երեխա կա։ Նրանք համապատասխան քաշ հավաքելուց հետո պատրաստվելու են դուրսգրման։
Հետծննդյան բաժանմունքում էլ նորածիններն արդեն մայրիկների մոտ են։ Ոմանք պատրաստվում են դուրսգրման, ոմանք հաղթահարում են հետծննդաբերական փուլը։
Ծննդատունը հիմա աշխատում է ծանրաբեռնված, բայց կենտրոնում այդ մասին խոսում են դրական երանգով․ չէ՞ որ դա նշանակում է՝ ավելի շատ մանուկների առաջին ճիչն է հնչելու այս հարկի տակ։
Մանրամասները՝ տեսանյութում։
Անի Թամրազյան
