29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
ԲԴԽ-ն պարզաբանում է տարածել, թե ինչու է Արմեն Աշոտյանը շարունակում մնալ կալանքի տակ
Հասարակություն
17.01.2024 | 12:21
Բարձրագույն դատական խորհուրդը պարզաբանում է տարածել ՀՀԿ փոխնախագահ Արմեն Աշոտյանի կալանավորման ժամկետը երկարացնելու վերաբերյալ։
«Ի պատասխան հանրության շրջանում բազմաթիվ հարցադրումների, թե ինչու է Արմեն Աշոտյանը շարունակոււմ մնալ կալանքի տակ, երբ «գործով վկաներն արդեն իսկ հարցաքննվել են», ցանկանում ենք պարզաբանել հետևյալը: Դատարանը գտել է, որ երբ պարոն Աշոտյանի նկատմամբ ընտրված է եղել ՀՀ-ից բացակայելու արգելքը, նա խախտել է խափանման միջոցի պայմանները, ինչն էլ հիմք է հանդիսացել կալանավորման:
Դատարանն արձանագրել է, որ թեև ՀՀ քրեական դատավարության օրենսգրքի 105–րդ հոդվածի 3-րդ մասի համաձայն՝ ոչ մի տվյալ նախապես հավաստի ապացույցի ուժ չունի, սակայն, խափանման միջոց կիրառելու հիմքերն ունեն կանխատեսական բնույթ, իսկ գործում առկա փաստական տվյալները բավարար են եղել հանգելու հետևության, որ քանի դեռ որևէ ապացույց չի հետազոտվել, պարոն Աշոտյանն ազատության մեջ հայտնվելու դեպքում կարող է խոչընդոտել քրեական վարույթին, այդ թվում՝ ապօրինի միջամտել ապացուցման գործընթացին»։
Նշենք, որ պաշտպանական կողմը Աշոտյանի՝ շարունակական կալանքի տակ գտնվելու հանգամանքը պայմանավորում է ոչ թե ապացուցման գործընթացին ապօրինի միջամտելու ռիսկը չեզոքացնելու նպատակով, այլ պնդում է,որ Աշոտյանի նկատմամբ քաղաքական հետապնդում է իրականացվում։
Պաշտպանները նիստերի ընթացքում բազմիցս պնդել են, որ վարույթին խոչընդոտելու վտանգը չի կարող որպես հիմք մատնանշվել՝ վերացական մակարդակով, այլ այդ վտանգը պետք է լինի հիմնավորված փաստական ապացույցներով։
