25.06.2026 | 20:31
Քարոզարշավի «գինը»․ ինչքան են ծախսել քաղաքական ուժերն ու ինչ «նվերներ» են ստացել. ՏԵՍԱՆՅՈՒԹ
Դատավոր Գրիգոր Հովհաննիսյանն առանց հիմնավորելու շեղվել է Վճռաբեկի դիրքորոշումից. նախարարություն․ ՏԵՍԱՆՅՈՒԹ
Հասարակություն
15.01.2024 | 11:48
Բարձրագույն դատական խորհուրդը որոշեց հետաձգել Վերաքննիչ քրեական դատարանի դատավոր Գրիգոր Հովհաննիսյանի վերաբերյալ կարգապահական վարույթը կարճելու միջնորդությունը և դրան անդրադառնալ վերջնական դատական ակտով: Այսօրվա ԲԴԽ նիստի ընթացքում Արդարադատության նախարարության ներկայացուցիչ Արտյոմ Սուջյանը ներկայացրեց դատավորին կարգապահական պատասխանատվության ենթարկելու միջնորդությունը:
Միջնորդության առիթը գլխավոր դատախազի հաղորդումն է: Դատախազը հայտնել է, որ դատավոր Գրիգոր Հովհաննիսյանը վարչապետ Նիկոլ Փաշինյանի որդու առևանգման գործով մեղադրյալ Ազգուշ Մարտիրոսյանի (հայտնի է որպես Գայանե Հակոբյան) խափանման միջոցի գործով, առանց հիմնավորելու, շեղվել է Վճռաբեկ դատարանի նախադեպային որոշումից:
Նշենք, որ Գրիգոր Հովհաննիսյանին մակագրվել է նախաքննության ընթացքում Ազգուշ Մարտիրոսյանի նկատմամբ կալանքը որպես խափանման միջոց ընտրելու վերաբերյալ որոշման դեմ բողոքը: Մինչ դատավորը որոշում կկայացներ, բուն գործն ուղարկվել է առաջին ատյանի դատարան՝ ըստ էության քննության, և դատավոր Մանվել Շահվերդյանը վարույթը ստանձնելու որոշում է կայացրել:
2023 թվականի հունիսի 5-ին Վերաքննիչ քրեական դատարանի դատավոր Գրիգոր Հովհաննիսյանը որոշել է Ազգուշ Մարտիրոսյանի նկատմամբ խափանման միջոց ընտրված կալանավորումը փոխել տնային կալանքով, որից ժամեր անց առաջին ատյանի դատարանի դատավոր Մանվել Շահվերդյանն Ազգուշ Մարտիրոսյանի վերաբերյալ բուն քրեական գործով նախնական դատալսումներ է իրականացրել և որոշել Մարտիրոսյանի նկատմամբ կրկին կալանավորումն ընտրել որպես խափանման միջոց:
«Դատավորը չի հիմնավորել Վճռաբեկ դատարանի նախադեպային դիրքորոշումից շեղվելը և առաջին ատյանի դատարանի կողմից վարույթը ստանձնած լինելու պայմաններում բեկանել է առաջին ատյանի դատարանի դատական ակտը»,-միջնորդությունը ներկայացնելիս ասաց ԱՆ ներկայացուցիչ Արտյոմ Սուջյանը՝ նշելով, որ Վճռաբեկ դատարանի նախադեպային դիրքորոշման համաձայն՝ այն իրավիճակում, երբ առաջին ատյանի դատարանը ստանձնել է վարույթը, վերաքննիչ դատարանն իրավունք ունի արձանագրել խախտումը, բայց իրավասու չէ բեկանել կայացված դատական ակտը:
Մանրամասները՝ տեսանյութում։
Արաքս Մամուլյան
