13.12.2025 | 16:15
Դեկտեմբերի 14-ի գիշերը Երևանի հանրային տրանսպորտն ավելի երկար կաշխատի
Դեմիրթաշն Էրդողանին ու ազգայնական գործիչներին կոչ է արել քննարկել քրդերի համար «ժողովրդավարական ինքնավարության» հարցը
Քաղաքականություն
10.01.2024 | 22:54
Թուրքիայի քրդերի բանտարկված առաջնորդ Սելահաթթին Դեմիրթաշը կոչ է արել նախագահ Ռեջեփ Թայիփ Էրդողանին և ազգայնական կուսակցության առաջնորդներին ուղիղ եթերում քննարկել քրդական փոքրամասնությանը «ժողովրդավարական ինքնավարություն տրամադրելու հարցը», գրում է Turkish Minute-ը։
Դեմիրթաշն իր կոչն ուղղել է Էրդողանին, ինչպես նաև Թուրքիայի ծայրահեղ աջ «Ազգայնական շարժում» կուսակցության առաջնորդ Դևլեթ Բահչելիին, ազգայնական ընդդիմադիր İYİ (Լավ) կուսակցության նախագահ Մերալ Աքշեներին և այլ ազգայնական կուսակցությունների ղեկավարների։
«Թող պայմանները հավասար լինեն։ Եկեք պաշտպանենք մեր գաղափարները, և թող ասեն այն, ինչ ուզում են։ Գրազ կգամ, որ հեռուստահաղորդման վերջում նրանք շատ լավ կհասկանան, թե ինչ է ժողովրդավարական ինքնավարությունը»,- ասել է Դեմիրթաշը։
Նա նաև յոթ առաջարկ է ներկայացրել քրդական հարցը լուծելու համար, որը վերաբերում է երկրի քուրդ բնակչության կողմից հավասար իրավունքների պահանջին և ճանաչման համար նրանց պայքարին:
Առաջարկները ներառում են զինված հակամարտության դադարեցման ապահովումը համապատասխան զրուցակիցների հետ բանակցությունների միջոցով, բոլոր իրավական և վարչական խոչընդոտների վերացում ժողովրդավարական քաղաքականության առաջ, քրդերին իրենց մայրենի լեզվով, պատմությամբ և մշակույթով ժողովուրդ ճանաչում, քրդական հարցի հետևանքներից բխող քրեական գործերի կարճում։
Նշենք, որ քրդամետ Ժողովուրդների դեմոկրատական կուսակցության (HDP) նախկին համանախագահ Դեմիրթաշը բանտում է 2016 թվականից։ Նա հայտարարությունը հնչեցրել է Քոբանիի գործով վերջին լսումների ժամանակ, որը հանգեցրել է տասնյակ քուրդ քաղաքական գործիչների բանտարկության, իբր, 2014 թվականին հիմնականում քրդերով բնակեցված հարավարևելյան նահանգներում մի շարք բողոքի ցույցեր հրահրելու համար՝ ի պատասխան սիրիացի քրդերի ու ԻԼԻՊ-ի միջև բախումների:
2014-ի ցույցերը բռնկվել էին այն ժամանակ, երբ ԻԼԻՊ-ի զինյալները պաշարել էին սիրիական Քոբանի քաղաքը, որտեղ հիմնականում քրդեր են բնակվում: Թուրքական բանակի անգործության պայմաններում ԻԼԻՊ-ի հարձակման դեմ ցույցերի ժամանակ 37 մարդ է զոհվել։
Էմմա Չոբանյան
