Քաղաքականություն
08.01.2024 | 12:15
Ադրբեջանի Կենտրոնական ընտրական հանձնաժողովը փետրվարի 7-ին կայանալիք արտահերթ նախագահական ընտրությունների համար գրանցել է Միլլի Մեջլիսի պատգամավորներ Զահիդ Օրուջի ու Ռազի Նուրուլլաևի թեկնածունները։ Ադրբեջանական լրատվամիջոցների հաղորդմամբ՝ այս որոշումը ԿԸՀ կայացրել է հունվարի 6-ին։ Այպիսով՝ նախագահի գրանցված թեկնածուների թիվը հասել է երեքի։ Ավելի վաղ՝ 2023 թվականի դեկտեմբերի 30-ին, ԿԸՀ-ն գրանցել էր գործող նախագահ Իլհամ Ալիևի թեկնածությունը իշխող «Նոր Ադրբեջան» կուսակցությունից։
Ընդհանուր առմամբ, առաջադրման հայտ է ներկայացրել նախագահի 17 թեկնածու։ Այսօր ժամը 18.00-ին լրանում է թեկնածուների գրանցման համար 40 հազար ընտրողի ստորագրությամբ փաստաթղթեր ներկայացնելու վերջնաժամկետը։
Նշենք, որ պատգամավորներ Օրուջն ու Նուրուլլաևը իրականում Իլհամ Ալիևի աջակիցներն են։ Սոցիալական հետազոտությունների կենտրոնի խորհրդի նախագահ Օրուջը մասնակցել է նաև 2018 թվականի նախագահական ընտրություններին՝ հավաքելով 3,11 տոկոս ձայն։ Պատգամավոր Ռազի Նուրուլլաևի թեկնածությունն առաջադրել է նրա ղեկավարած «Ազգային ճակատ» կուսակցությունը։ Նա ևս մասնակցել էր 2018-ի նախագահական ընտրություններին։
Հիշեցնենք, որ Ադրբեջանի ընդդիմադիր կուսակցությունները բոյկոտում են նախագահական ընտրությունները։
Էմմա Չոբանյան
