16.07.2026 | 15:55
Վանաձորի նախկին համայնապետ Մամիկոն Ասլանյանի վերաբերյալ նոր գործ է ուղարկվել Հակակոռուպցիոն դատարան
Ցմահ դատապարտյալը հացադուլ է հայտարարել, պահանջում է հանդիպում վարչապետի հետ
Հասարակություն
03.08.2018 | 17:33
Սպանության համար ցմահ դատապարտված Վաղարշակ Ավետիսյանը, որը պատիժը կրում է ԱՆ «Արմավիր» քրեակատարողական հիմնարկում, հայտարարել է անժամկետ հացադուլ և ջրադուլ։ Նա հանդիպում է պահանջում արդարադատության նախարարի և գլխավոր դատախազի հետ։
Թե ո՞րն է դատապարտյալի պահանջը և այս առնչությամբ ի՞նչ քայլեր է իրականացրել քրեակատարողական հիմնարկի ղեկավարությունը, Factor.am-ը փորձեց պարզել ԱՆ քրեակատարողական ծառայությունից։
Մեզ հետ զրույցում ԱՆ քրեակատարողական վարչության հանրային կապերի բաժնի պետ Նոնա Նավիկյանը նշեց, որ Վաղարշակ Ավետիսյանը հացադուլ է հայտարարել օգոստոսի 1-ին։
«Վերջինս պահանջում է վերանայել իր դատական գործը։ Պահանջում է հանդիպում և՛ հանրապետության վարչապետի, և՛ արդարադատության նախարարի, և՛ գլխավոր դատախազի հետ»,- նշեցին քրեակատարողական ծառայության լրատվական բաժնից։
Հարցին՝ արդյոք քրեակատարողական հիմնարկի ղեկավարությունը ընդառաջ է գնալու դատապարտյալի պահանջին և ինչ քայլեր է ձեռնարկելու, որպեսզի Վաղարշակ Հարությունյանը դուրս գա հացադուլից, քրեակատարողական ծառայության հանրային կապերի բաժնից պատասխանեցին․ «Մենք որևէ բան անել չենք կարող։ Ընդամենը կարող ենք ներկայացնել, որ խնդիր կա։ Դա արդեն հակառակ կողմը կորոշի՝ ընդառաջ գնա՞լ դատապարտյալի ցանկությանը, թե՝ ոչ»։
Նշենք, որ Քրեական օրենսգքրի 104 հոդվածով դատապարտված Վաղարշակ Ավետիսյանն ավելի վաղ ևս հացադուլ էր հայտարարել: Նա դատապարտվել է տաքսու վարորդի սպանության համար, չի ընդունում իրեն առաջադրված մեղադրանքը և պահանջում է վերաբացել իր քրեական գործը։
Աղավնի Սուքիասյան
