14.12.2024 | 19:57
Ինչ իրավիճակ է ճանապարհներին 19։35-ի դրությամբ
«Ֆրանսիան իր վնասակար գործողություններով խաթարում է Հայաստանի և Ադրբեջանի միջև խաղաղ գործընթացի հեռանկարները»․Ալիևի ներկայացուցիչ
29.12.2023 | 12:48
Ադրբեջանի նախագահ Իլհամ Ալիևի հատուկ հանձնարարությունների գծով ներկայացուցիչ Էլչին Ամիրբեկովը ֆրանսիական Le Monde-ին տված հարցազրույցում ասել է, թե Բաքվի և Փարիզի միջև երկկողմ հարաբերությունների նկատվող վատթարացման պատճառը Ֆրանսիայի «բացարձակապես անարդար, կողմնակալ հայամետ դիրքորոշումն է»։ Ալիևի ներկայացուցիչը պնդել է, որ «Ֆրանսիան երկար ժամանակ վնասակար գործողություններ է իրականացնում՝ Հայաստանին տրամադրում է բոլոր տեսակի՝ դիվանագիտական, տնտեսական, իսկ վերջին շրջանում նաև ռազմական աջակցություն, խաթարում է Հայաստանի և Ադրբեջանի միջև խաղաղության հասնելու հեռանկարները»։
«Միջազգային տարբեր հարթակներ, ինչպիսիք են ՄԱԿ-ի Անվտանգության խորհուրդը, Եվրամիությունը և նրա ինստիտուտները՝ բացահայտ հակաադրբեջանական նախաձեռնությունները խթանելու փորձերը, ոչ միայն լիովին խարխլեցին Ֆրանսիայի առանց այն էլ կասկածելի հեղինակությունը՝ որպես հնարավոր միջնորդի, այլև լուրջ վնաս հասցրեցին Բաքվի վստահությանը հենց Եվրամիության նկատմամբ, որտեղ Ֆրանսիան ունի առաջատար դերերից մեկը»,-բողոքել է Ամիրբեկովը։
Թեպետ Ադրբեջանը շարունակում է Թուրքիայից, Իսրայելից ու այլ երկրներից ժամանակակից սպառազինությունների ձեռքբերումը՝ Ամիրբեկովը դժգոհել է Ֆրանսիայի ու Հայաստանի ռազմական համագործակցությունից։ Նա նշել է, թե «զենքի մատակարարումները Երևանին ապակայունացնում և խաթարում են անվտանգությունը Հարավային Կովկասում՝ տարածաշրջանը մղելով դեպի նոր ռազմական հակամարտություններ, սպառազինությունների անիմաստ մրցավազքի և արհեստականորեն ձգձգելով Հայաստանի և Ադրբեջանի միջև խաղաղության հասնելու հեռանկարները»։
Նշենք, որ նախօրեին էլ Ադրբեջանի ԱԳ նախարար Ջեյհուն Բայրամովն իր հերթին էր դժգոհություն հայտնել Ֆրանսիայից՝ ադրբեջանցի դիվանագետներին անցանկալի անձ ճանաչելու համար։
Էմմա Չոբանյան
