23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Իրանի և ՌԴ-ի ԱԳ նախարարները քննարկել են Հարավային Կովկասում զարգացումները
Քաղաքականություն
27.12.2023 | 13:10
Իրանի ԱԳ նախարար Հոսեյն Ամիր Աբդոլլահիանն ու ՌԴ ԱԳ նախարար Սերգեյ Լավրովը երեկ երեկոյան հեռախոսազրույց են ունեցել։ Իրանական ՄԵՀՐ գործակալության փոխանցմամբ՝ Լավրովն իրանցի գործընկերոջն ասել է, որ Ռուսաստանն անկեղծորեն, ազնվորեն և անվերապահորեն հարգում է Իրանի տարածքային ամբողջականությունը, և դա Մոսկվայի անփոփոխ դիրքորոշումն է։
Նշվում է, որ երկու երկրների ԱԳ նախարարները քննարկել են Հարավային Կովկասում տեղի ունեցող զարգացումները, համագործակցության և երկկողմ հարաբերությունների վերջին վիճակը, տարածաշրջանային և միջազգային որոշ հարցեր։
Անդրադառնալով Կովկասյան տարածաշրջանում առկա զարգացումներին՝ Աբդոլլահիանը ողջունել է Ադրբեջանի և Հայաստանի միջև կայուն խաղաղության համաձայնագրի ձեռքբերման բանակցությունների գործընթացը և ընդգծել Իրանի աջակցությունը տարածաշրջանում խաղաղության և կայունության հաստատման գործում։
Լավրովն իր հերթին շնորհավորել է Իրանին Եվրասիական տնտեսական միության հետ ազատ առևտրի համաձայնագրի ստորագրման կապակցությամբ՝ այն համարելով շատ կարևոր քայլ ԻԻՀ-ի և Ռուսաստանի, ինչպես նաև միության անդամ երկրների միջև տնտեսական հարաբերությունների զարգացման գործում։
Նա նաև նշել է երկու երկրների համագործակցությունը Ռեշտ-Աստարա երկաթուղու կառուցման հարցում՝ ընդգծելով, որ Մոսկվան ավարտել է այս համաձայնագրի իրականացման համար ներքին բոլոր ձևակերպումները, շեշտել ՌԴ-ի վճռականությունը այն արագացնելու հարցում։
Հեռախոսազրույցում կողմերն ընդգծել են, որ հարգում են միմյանց ինքնիշխանությունն ու տարածքային ամբողջականությունը։
Էմմա Չոբանյան
