03.06.2026 | 23:39
ՌԴ-ն մտադիր է հայկական գյուղմթերքը փոխարինել Ադրբեջանից ներմուծումներով
Թեոդոսիայում Ուկրաինայի ԶՈՒ-ի կողմից հարձակման ենթարկված «Նովոչերկասկ» նավի առնվազն 33 նավաստիներ անհետացել են
Քաղաքականություն
27.12.2023 | 13:33
Առնվազն 33 նավաստիներ համարվում են անհետ կորած այն բանից հետո, երբ Ուկրաինայի զինված ուժերը հարվածել են ռուսական «Նովոչերկասկ» դեսանտային նավին Ղրիմի Թեոդոսիա նավահանգստում: Այս մասին հայտնում է Astra տելեգրամ ալիքը՝ վկայակոչելով իր աղբյուրներին, գրում է Meduza-ն։
Աղբյուրի տվյալներով՝ դեկտեմբերի 26-ի գիշերը հարձակման ժամանակ նավում եղել է 77 նավաստի։ Անհետ կորածներից զատ՝ ևս 19 նավաստի վիրավորվել է։
Ղրիմի ղեկավար Սերգեյ Աքսյոնովն ավելի վաղ հայտնել էր նավահանգստում տեղի ունեցած հարձակման հետևանքով մեկ զոհի և չորս խաղաղ բնակիչների վիրավորվելու մասին։ Astra-ի փոխանցմամբ՝ նավահանգստի անվտանգության աշխատակից, 64-ամյա Նադեժդա Տոլշչինան մահացել է։
Նշվում է նաև, որ հարձակման վայրում հայտնաբերվել է Storm Shadow հրթիռի կցման կետ։
Հավելենք, որ Ուկրաինայի ԶՈՒ ռազմաօդային ուժերի հրամանատարությունը դեկտեմբերի 26-ին հայտնել էր, որ ուկրաինական ավիացիան Թեոդոսիայի վրա հարձակման ժամանակ թևավոր հրթիռներով պայթեցրել է Ռուսաստանի Սևծովյան նավատորմի «Նովոչերկասկ» խոշոր դեսանտային նավը։ ՌԴ ՊՆ-ն իր հերթին հայտնել է, որ նավը վնասվել է ուկրաինական հարձակումը հետ մղելիս։ Լուսանկարներում, որոնք արվել են հարվածից հետո, երևում է, որ նավը գրեթե ամբողջությամբ խորտակվել է: Դրա հետ մեկտեղ, մասամբ խորտակվել է T-43 դասի ուսումնական «УТС-150» նավը։
Էմմա Չոբանյան
