15.09.2026 | 13:33
Վաշինգտոնում հայկական բրենդիի համտեսի երեկո է անցկացվել
Գերմանացի պաշտոնյան հնարավոր է համարել Կիևի կողմից իր տարածքներից ժամանակավորապես հրաժարվելը
Քաղաքականություն
27.12.2023 | 15:15
Ուկրաինայում զինադադարի հասնելու համար Կիևը կարող է ստիպված լինել խոստովանել, որ Ռուսաստանի Դաշնության կողմից օկուպացված տարածքները «ժամանակավորապես» անհասանելի են իր համար։ Այս մասին հայտարարել է գերմանական Սաքսոնիա դաշնային նահանգի վարչապետ Միխայել Կրետշմերը, գրում է DW-ի ռուսական ծառայությունը։
«Ուկրաինական տարածքի ոչ մի քառակուսի մետր չի դարձել ռուսական։ Բայց, ինչպես մյուս խոշոր հակամարտությունների դեպքում, վերջնական լուծումը ժամանակ կպահանջի»,- նշել է Քրիստոնեա-դեմոկրատական միություն (ՔԴՄ) կուսակցությունից քաղաքական գործիչը
Կրետշմերը նաև Գերմանիայի կառավարությանը հերթական անգամ կոչ է արել ոչ միայն զենք մատակարարել Ուկրաինային, այլև դիվանագիտական ուղիներ փնտրել՝ պատերազմը դադարեցնելու համար։ Սաքսոնիայի վարչապետի խոսքով՝ Գերմանիան իր դաշնակիցների հետ միասին պետք է «ազդի Ռուսաստանի նախագահ Վլադիմիր Պուտինի վրա և հնարավոր դարձնի կրակի դադարեցումը»։
«Ամերիկացիներն առաջ են գնացել (Գերմանիայի համեմատ): Նրանք արդեն հասկացել են, որ այդպես չես կարող հաղթել պատերազմում»,- կարծում է Կրետշմերը:
Նա խոստովանել է, որ Ռուսաստանը Գերմանիայի համար «վտանգավոր, անկանխատեսելի հարևան է»։ Այնուամենայնիվ, «Ռուսաստանի Դաշնությունը ռազմական, քաղաքական և տնտեսապես թուլացնելու գաղափարը, որպեսզի այն մեզ համար վտանգ չներկայացնի, 19-րդ դարից սկսած մոտեցում է: Այն հիմք է դնում հետագա հակամարտությունների համար», կարծիք է հայտնել Սաքսոնիայի վարչապետը։
