«Ի՞նչ տոնենք, Արցախի լուծարո՞ւմը»․ Հակոբջանյանների ընտանիքն Ամանորի շեմին սննդի և գումարի կարիք ունի․ ՏԵՍԱՆՅՈՒԹ

«Ես ցանկանում եմ խաղաղություն լինի, վերադառնանք Արցախ, մեր տունը…»․ սա արցախցի 11-ամյա Ռիտայի ամանորյա երազանքն է, որի մասին իրար հերթ չտալով՝ խոսում են նաև նրա քույրերն ու եղբայրները։

Ձմեռ պապին ուղղված նամակում 3-ամյա Անկայի և 5-ամյա Լուիզայի ցանկությունները մեծ չեն, բայց ընտանիքն անգամ դրանց իրականացումը չի կարող ապահովել։ Հարցին՝ ի՞նչ նվեր են ուզել Ձմեռ պապիկից, քույրերը միանգամից բացականչում են՝ «Տիկնի՛կ»։

Իսկ 8-ամյա Շահենը ծիծաղելով ասում է՝ երևի Ձմեռ պապիկն իր նամակի կեսն է կարդացել, քանի որ միայն մեկ ցանկություն է կատարել։ 7-ամյա եղբայրը՝ Մավրիկն էլ միանգամից հավելում է՝ ինքն էր հեծանիվ ուզել, բայց Ձմեռ պապիկը Շահենին է բերել։

Մինչ երեխաներն իրար հերթ չտալով պատմում են, թե ինչ նվերներ են ակնկալում Ձմեռ պապից, ընտանիքի մայրը՝ 41-ամյա Սուսան Հակոբջանյանը, արցունքն աչքերին ասում է՝ տրամադրություն չունեն անգամ փոքրիկ տոնածառ դնելու։

Հակոբջանյանների 8 հոգանոց ընտանիքը մի քանի պատերազմների միջով է անցել․ 41-ամյա Սասուն Հակոբջանյանը մասնակցել է քառօրյա և 44-օրյա պատերազմներին։ Դրանք իրենց հետքն են թողել Սասունի վրա․ այսօր նա 3-րդ կարգի հաշմանդամություն ունի։

Բուժման համար Հակոբջանյանները հասել են Երևան․ 4 ամիս ՀՀ-ում մնալուց հետո ընտանիքը վերադարձել է, այս անգամ՝ արդեն Ստեփանակերտ։ Մի քանի ամսից սկսվել է շրջափակման ծանր շրջանը։ Այդ ժամանակ ընտանիքի համար հույսի մի շող է բացվել․ Արցախի իշխանությունները 6 անչափահաս ունեցող բազմազավակ ընտանիքին բնակարան են հատկացրել։ Սակայն ուրախությունը երկար չի տևում․ բացվում է սեպտեմբերի 19-ի ճակատագրական առավոտը։

10 օր անց ընտանիքը բռնում է գաղթի ճամփան, երկու օր անց՝ հասնում ՀՀ։ Շուրջ երկու ամիս ընտանիքը տնից տուն է տեղափոխվում և վերջնականապես հաստատվում Արարատի մարզի Մարմարաշեն գյուղի կիսակառույց տներից մեկում, պետության տրամադրած վերջին գումարներով փորձում նորոգել տունը։ Սասունի խոսքով՝ արդեն երկու ամիս է՝ տուն գումար չի մտնում։

Չորս ամիս է՝ Սասունը չի ստացել նաև հաշմանդամության թոշակն ու երեխաների նպաստը։ Այս պահին ընտանիքը գրեթե ամեն ինչի կարիք ունի․ իրենց հետ կարողացել են բերել միայն երեխաների մի քանի հագուստ։

Այս ամբողջ դժվարությունների մեջ Հակոբջանյան ամուսինների համար անասելի ցավոտ է հունվարի 1-ից Արցախի հանրապետության փաստացի լուծարման հրամանագիրը։ Նախկին զինվորականը ցավով է արձանագրում՝ նման վերջաբանի չէր սպասում։

Մանրամասները՝ տեսանյութում։

Ռոզա Վարդանյան