23.02.2026 | 13:14
Բուժաշխատողները բողոքում են․ ակցիա՝ ապահովագրական համակարգի բացերի շուրջ ԱԺ լսումներ անցկացնելու պահանջով
Թուրքիայում քրդամետ կուսակցության 42 անդամ է ձերբակալվել
Քաղաքականություն
25.12.2023 | 22:34
Թուրքիայի անվտանգության ուժերը Դիարբեքիրում ձերբակալել են քրդամետ Ժողովուրդների իրավահավասարություն և ժողովրդավարություն կուսակցության (DEM, նախկինում՝ HDP) 42 անդամների՝ նրանց մեղադրելով «օրենքին հակառակ» գործելու համար, գրում է Rudaw-ն։
DEM կուսակցությունն անցկացրել է իր երիտասարդական համագումարը։ Միջոցառմանը ներկա է եղել կուսակցության համանախագահ Թունջեր Բաքըրհանը։ Դիարբեքիրի նահանգապետարանի հայտարարության մեջ ասվում է, որ համագումարին մասնակցած 42 անձ է ձերբակալվել՝ պնդմամբ, որ նրանք «գործել են օրենքին հակառակ, քարեր են նետել ոստիկանների ուղղությամբ և դիմադրել»։
Թուրքիայի արդարադատության նախարար Յըլմազ Թունջը X-ի իր միկրոբլոգում գրել է, որ դատախազությունն«անհրաժեշտ դատական հետաքննություն է սկսել կասկածյալների դեմ՝ կապված «հանցագործությունը և հանցագործներին գովերգելու» և «ահաբեկչական կազմակերպության քարոզչության» հետ։ Նա հավելել է, որ կասկածյալներից մի քանիսի նկատմամբ կալանավորման օրդեր է տրվել։
BBC-ի թուրքական ծառայությունն էլ, վկայակոչելով DEM կուսակցության աղբյուրին, հաղորդում է, որ 57 մարդ բերման է ենթարկվել և ուղարկվել նահանգային անվտանգության վարչություն՝ ցուցմունք տալու համար։
Ձերբակալությունները տեղի են ունենում այն ժամանակ, երբ Թուրքիան սգում է Իրաքի հյուսիսում Քուրդիստանի աշխատավորական կուսակցության (PKK) կողմից 12 թուրք զինվորների սպանությունը։
Նրանց մահը վրդովմունք է առաջացրել ինչպես թուրք հասարակության, այնպես էլ քաղաքական գործիչների շրջանում։ Խորհրդարանի չորս կուսակցություններ՝ ինչպես իշխող, այնպես էլ ընդդիմադիր ճամբարներից, ստորագրել են համատեղ հռչակագիր՝ դատապարտելով PKK-ի հարձակումները թուրքական զորքերի վրա, մինչդեռ թուրքական ամենամեծ ընդդիմադիր՝ Ժողովրդահանրապետական կուսակցությունը կոչ է անում պաշտպանության նախարար Յաշար Գյուլերին խորհրդարան հրավիրել՝ դռնփակ նիստի։
Էմմա Չոբանյան
