08.04.2026 | 01:11
Խարբերդի ամառանոցներից դեպի Նուբարաշեն ավտոճանապարհին 5 մեքենա է բախվել. 3 անձ հոսպիտալացվել է
Ադրբեջանում հերթական քաղաքական ակտիվիստն է կալանավորվել
Քաղաքականություն
25.12.2023 | 14:41
Ադրբեջանի իշխանությունները շարունակում են ընդդիմադիրների, լրագրողների ու քաղակտիվիստների ձերբակալությունները։ Դատարանի որոշմամբ 25-օրով կալանավորվել է NIDA սոցիալական շարժման և «Երրորդ հանրապետություն» քաղաքական պլատֆորմի անդամ Արազ Ալիևը։
Ադրբեջանական լրատվամիջոցները, վկայակոչելով իրավապահ մարմիններում իրենց աղբյուրներին՝ հայտնում են, որ Արազ Ալիևը մեղադրվում է Վարչական իրավախախտումների վերաբերյալ օրենսգրքի 510 հոդվածով (թեթև խուլիգանություն):
«Երրորդ հանրապետություն» պլատֆորմի խոսնակ Ակիֆ Գուրբանովն էլ ասել է, որ Արազ Ալիևի ձերբակալությունը կապված է քաղաքական կազմակերպության գործունեության հետ։ «Երրորդ հանրապետության» ձևավորումը, ըստ երևույթին, մեծապես անհանգստացրել է ռեժիմին։ Ինչպես արդեն հայտարարել ենք, մենք ցանկանում ենք վերահսկվող հասարակությունից անցնել ինքնակառավարվող հասարակության։ Մեր հիմնական կարգախոսը՝ «Մենք հնազանդվում ենք օրենքին, ոչ թե անհատին»,-գրել է Գուրբանովը ֆեյսբուքյան իր էջում։
Հավելենք, որ դեկտեմբերի 7-ին մի խումբ հասարակական-քաղաքական ակտիվիստներ հայտարարել էին Երրորդ հանրապետության հարթակ» կոչվող քաղաքական կազմակերպության ստեղծման մասին։
Վերջին շաբաթներին Ադրբեջանի իշխանությունները բռնաճնշումների նոր ալիք են սկսել ընդդիմադիրների, լրագրողների ու քաղհասարակության ներկայացուցիչների դեմ։ Վերջին մեկ ամսում առնվազն 8 լրագրող է կալանավորվել։
Էմմա Չոբանյան
