Քաղաքականություն
25.12.2023 | 11:42
Իրանում Ռուսաստանի գործերի ժամանակավոր հավատարմատարը կանչվել է երկրի արտաքին գործերի նախարարություն, հայտնում է BBC-ի ռուսական ծառայությունը։ Նրան բողոքի նոտա է հղվել այն պատճառով, որ Մոսկվան միացել է արաբական մի խումբ երկրների հայտարարությանը, որոնք պաշտպանում են Արաբական Միացյալ Էմիրությունների հավակնությունները Թեհրանի կողմից վերահսկվող երեք կղզիների նկատմամբ։
Մեծ Թոմբ, Փոքր Թոմբ և Աբու Մուսա կղզիները գտնվում են Հորմուզի նեղուցից արևմուտք: Իրանը այս կղզիները համարում է իր տարածքը։
Հայտարարությունն ընդունվել էր չորեքշաբթի օրը Մարոկկոյում կայացած ռուս-արաբական համագործակցության ֆորումի արդյունքներով։ Ամփոփիչ հայտարարության մեջ ասվում է, որ կողմերն «աջակցում են բոլոր խաղաղ ջանքերին, ներառյալ նախաձեռնություններին և ջանքերին Մեծ Թոմբ, Փոքր Թոմբ և Աբու Մուսա կղզիների հիմնախնդրի խաղաղ լուծման հասնելու համար՝ համաձայն միջազգային իրավունքի սկզբունքների և ՄԱԿ-ի կանոնադրության»: Դեռևս հուլիսին հայտարարություն էր ընդունվել Ռուսաստանի և Պարսից ծոցի արաբական երկրների համագործակցության խորհրդի միջև ռազմավարական երկխոսության շրջանակներում նախարարների հանդիպումից հետո։ Այնտեղ առաջարկվել էր տարածքային վեճը լուծել երկկողմ բանակցությունների միջոցով կամ Արդարադատության միջազգային դատարանում։ Այդ ժամանակ ևս պաշտոնական Թեհրանն իր դժգոհությունն էր արտահայտել։
