Մեզանում պետությունն ավելի փոքր արժեք է, քան ազգը, սփյուռքում` հատկապես. Գևորգ Տեր-Գաբրիելյան. ՏԵՍԱՆՅՈՒԹ

«Ամբողջ աշխարհում հարձակում է տեղի ունենում ժողովրդավարության վրա: Դիսկուրսը, թե պետք է լինել ավտորիտար` մարտահրավերներին դիմագրավելու համար, գնալով ուժգնանում է: Հայաստանում այս պահին չունենք կայուն ժողովրդավարության երաշխիքներ, հատկապես եթե հաշվի առնենք դրսի, մասնավորապես` Ռուսաստանի ճնշումները»,-Factor TV-ի հետ զրույցում նման տեսակետ է հայտնում արձակագիր, հրապարակախոս Գևորգ Տեր-Գաբրիելյանը: Նրա խոսքով` աշխարհում ժողովրդավարական և ոչ ժողովրդավարական համակարգերի միջև պատերազմ է: Ինչ վերաբերում է Հայաստանին, գրողի համոզմամբ, մեր երկիրն էլ մտել է ռիսկի աշխարհ և գաղափարական մակարդակում ասում է`ես ժողովրդավարության հետ եմ:

Գևորգ Տեր-Գաբրիելյանն այն կարծիքին է, որ տարիների ընթացքում միֆականացված ազգայնականությունը դարձավ մեր միակ գաղափարախոսությունը. «Մեզանում պետությունն ավելի փոքր արժեք է, քան ազգը, սփյուռքում` ատկապես: Մեզ մոտ գիտական գաղափարախոսությունը չզարգացավ»:

Մեր զրուցակիցը խոսում է նաև ժամանակակից հայ գրականության մասին` նկատելով, որ գավառականությունը միշտ եղել է և այժմ էլ առկա է նաև այս ոլորտում. «Գրողներից ամեն մեկն իր փոքր պարտեզն է մշակում, չկա մտքերի փոխանակում, քննարկում հասարակության հետ, չկան գրախոսություններ, մի խոսքով` ինֆրակառուցվածքը չկա: Գրողները միմյանց հետ մրցում են ճղճիմ հարցերի շուրջ, այլ ոչ`բարձունքներ գրավելու: Այս ոլորտում էլ կա գավառականություն, որն, առհասարակ, վտանգ է մեր երկրի համար. այն կարող է երկրորդ աշխարհից գցել մեզ երրորդ աշխարհ, ապա` չորրորդ, և առանձին «պարտեզներով» դրա դեմ պայքարելը դժվար է»,-ասում է նա:

Մանրամասները` տեսանյութում:

Աննա Բաբաջանյան