Օրբանն ընդունել է Զելենսկիի հրավերը

Հունգարիայի վարչապետ Վիկտոր Օրբանը հայտարարել է, որ ընդունել է Ուկրաինայի նախագահ Վլադիմիր Զելենսկու՝ երկկողմ հանդիպում անցկացնելու առաջարկը։ Ռուսական ներխուժման մեկնարկից ի վեր սա կլինի երկու առաջնորդների առաջին լիարժեք բանակցությունները, գրում է Euronews-ը։
Ինչպես Օրբանն ասել է Բուդապեշտում իր տարեկան մամուլի ասուլիսում, ինքը և Ուկրաինայի առաջնորդը մի քանի խոսք են փոխանակել դեկտեմբերի 10-ին Բուենոս Այրեսում Արգենտինայի նախագահ Խավիեր Մայլիի երդմնակալության արարողության շրջանակում։ Մասնավորապես, Վլադիմիր Զելենսկին առաջարկել է քննարկել Եվրամիությանը Ուկրաինայի անդամակցության հեռանկարները։

«Եթե մենք ուզում ենք գումար հատկացնել Ուկրաինային, առաջին հերթին, եկեք դա չհատկացնենք հինգ տարով, քանի որ մենք պատկերացում չունենք, թե ինչ կլինի վեց ամսից: Այնպես որ, եկեք խելամիտ ժամկետ սահմանենք: Երկրորդ․ մենք պետք է նայենք Միացյալ Նահանգների  աջակցության չափը։ Երրորդ առաջարկը․ եթե անգամ փող ենք տալիս, ընդհանուր բյուջեից չպետք է հատկացնենք։ Եվ վերջապես, սա չպետք է լինի ընդհանուր որոշում»,- ասել է Հունգարիայի վարչապետը։

Ավելի վաղ Հունգարիան արգելափակել էր Ուկրաինային 50 մլրդ եվրոյի ֆինանսական օգնության փաթեթի հատկացումը։ Ասուլիսում Վիկտոր Օրբանը կրկին ընդգծել է, որ միջոցները պետք է հատկացնեն Կիևին օգնել ցանկացող երկրները, այլ ոչ թե Բրյուսելը ԵՄ բյուջեից։ Դրանում Հունգարիայի համաձայնությունը փնտրելով՝ ԵՄ-ն «գործնականում շանտաժի է ենթարկում» Բուդապեշտին, ասել էր նա։