15.06.2026 | 11:54
Լեգենդար Մայք Թայսոնը ժամանել է Հայաստան․ ՏԵՍԱՆՅՈՒԹ
Տրանսպորտի նախարարն ընդունել է «Ռուսական երկաթուղիներ» ընկերության բարձրաստիճան պաշտոնյային
Տնտեսություն
02.08.2018 | 16:11
ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանն օգոստոսի 2-ին ընդունեց «Ռուսական երկաթուղիներ» ընկերության գլխավոր տնօրենի առաջին տեղակալ Ալեքսանդր Միշարինին. տեղեկացնում է ՀՀ տրանսպորտի, կապի և տեղեկատվական տեխնոլոգիաների նախարարության
լրատվական ծառայությունը:
Ողջունելով հյուրին՝ Աշոտ Հակոբյանն անդրադարձավ «Հարավկովկասյան երկաթուղիներ» ընկերության վերջին տարիների գործունեությանը: Նա նշեց, որ ընկերությունն իր պարտավորությունների շրջանակներում որոշակի աշխատանքներ է իրականացրել անվտանգության բարձրացման, փոխադրումների ծավալների, գնացքների միջին արագության մեծացման, շարժակազմերի թարմացման, ուղևորների սպասակման որակի բարձրացման ուղղությամբ։
Նախարարը հատկապես ընդգծեց Երևան-Գյումրի ուղղությամբ նոր էլեկտրագնացքի շահագործման կարևորությունը, ինչի շնորհիվ զբոսաշրջային հոսքը դեպի Գյումրի մեծացել է։
Ալեքսանդր Միշարինը, շնորհակալություն հայտնելով ընդունելության համար, «Ռուսական երկաթուղիներ» ընկերության գլխավոր տնօրենի և իր անունից շնորհավորեց նախարարին պաշտոնը ստանձնելու կապակցությամբ։ Նա ընդգծեց, որ երկաթուղային տրանսպորտի ոլորտում երկու երկրների միջև համագործակցության դրական փորձը տասնամյակների պատմություն ունի, և լիահույս է, որ ապագայում այն առավել արդյունավետ և ընդգրկուն կլինի։
Հանդիպման ընթացքում քննարկվեցին երկկողմ գործակցության մի շարք ուղղություններ։ Մասնավորապես, տարանցիկ և մուլտիմոդալ փոխադրումների բնագավառում համագործակցությունն առավել խորացնելու, նոր էլեկտրագնացքներ ներդնելու, թվային տեխնոլոգիաները երկաթուղային փոխադրումների ոլորտում կիրառելու հնարավորությունները:
