26.06.2026 | 02:03
ԱԱ-2026. Գերմանիան անակնկալ պարտություն կրեց, Կոտ դ’Իվուարը հաղթեց. ՏԵՍԱՆՅՈՒԹ
Ադրբեջանում արգելափակել են «Kanal 13» հեռուստաալիքը
Քաղաքականություն
21.12.2023 | 16:50
Ադրբեջանի իշխանությունները, «Kanal 13» առցանց հեռուստատեսության հիմնադիր և գլխավոր խմբագիր Ազիզ Օրուջևի ձերբակալությունից հետո, ամբողջությամբ արգելափակել են լրատվամիջոցը։ Տեղական լրատվամիջոցների հաղորդմամբ՝ Ներքին գործերի նախարարությունը բարձրացրել է Օրուջևի ղեկավարած լրատվամիջոցն արգելափակելու հարցը։ Այդ նպատակով ՆԳՆ-ն դեկտեմբերի 1-ին գրություն է ուղարկել Թվային զարգացման և տրանսպորտի նախարարություն։
Նամակում նշվում է, որ Ազիզ Օրուջևը մեղադրյալ է քրեական գործով, և անհրաժեշտ է արգելափակել նրա գլխավորած ինտերնետային ռեսուրսը։ ՆԳՆ-ն, հիմնավորելով այս պահանջը, նշել է, որ այս լրատվամիջոցն ընդգրկված չէ ԶԼՄ-ների ռեգիստրում։
«Այն վաղուց բացասաբար է անդրադառնում հասարակությանը ճշգրիտ և օբյեկտիվ տեղեկատվություն տրամադրելու հնարավորության վրա»,- ասվում է նամակում։
Այս գրության հիման վրա Թվային զարգացման և տրանսպորտի նախարարությունը դիմել է դատարան՝ լրատվամիջոցն արգելափակելու պահանջով։ Գործը քննվել է Սաբայիլի շրջանային դատարանում։ Կայացել է ընդամենը մեկ նիստ։
Դեկտեմբերի 11-ին կայացած նիստում մասնակցել են միայն Թվային զարգացման և տրանսպորտի նախարարության ներկայացուցիչը։ Չնայած լրատվամիջոցը գործով շահագրգիռ կողմ է, սակայն դատավարությունը տեղի է ունեցել առանց Ազիզ Օրուջևի կամ Kanal 13-ի մեկ այլ ներկայացուցչի մասնակցության։ Դատավարության ավարտից հետո դատավոր Իլքին Ռուստամլին պաշտպանել է հայցը և որոշում է կայացրել արգելափակել այն:
Իր հերթին, Ազիզ Օրուջևի փաստաբան Բահրուզ Բայրամովն ասել է, որ իրենք տեղեկացված չեն եղել ո՛չ նախարարության պահանջի, ո՛չ էլ դատավարության մասին։
Դեկտեմբերի 19-ին Kanal-13-ի ղեկավար Ազիզ Օրուջևին լրացուցիչ մեղադրանք է առաջադրվել Ադրբեջանի Քրեական օրենսգրքի 206.3.2 հոդվածով (մաքսանենգություն):
Հիշեցնենք, որ Ազիզ Օրուջևը ձերբակալվել էր նոյեմբերի 27-ի երեկոյան։ Դատարանը նրա նկատմամբ խափանման միջոց էր ընտրել 3 ամիս ժամկետով կալանավորումը։
Էմմա Չոբանյան
