Ռուսաստանը կարող է հրաժարվել Հայաստանին զենք մատակարարելուց․ ռուս փորձագետներն անհանգստացած են

ՀԱՊԿ-ի գլխավոր քարտուղար Յուրի Խաչատուրովի նկատմամբ մեղադրանքի առաջադրումը շարունակում է քննարկվել ռուսական փորձագիտական շրջանակներում։

Взгляд թերթին տված հարցազրույցում ռազմական փորձագետ Ալեքսանդր Խրամչիխինը նշել է․«ՀԱՊԿ-ը հավաքական կազմակերպություն է, որում ներկայացված են հինգ երկիր։ Այդ պատճառով՝ ռուսական կողմի արձագանքը՝ դադարեցնել ռազմական տեխնիկայի ապահովումը Հայաստանին, բացարձակապես ոչ ադեկվատ է»։

Փորձագետը, սակայն, չի բացառել, որ Հայաստանը կարող է ռուսական կողմից նման որոշման կայացման պարագայում սկսել այլ մատակարարների փնտրտուք։
Ալեքսանդր Խրամչիխինը նաև ընդգծել է, որ եթե Ռուսաստանը դադարեցնի Հայաստանին մատակարարել ռազմական տեխնիկա և զինամթերք, ապա դա Հայաստանի համար կլինի շատ կարևոր որոշում։ «Եթե Ռուսաստանը որոշի խզել ՀՀ-ի հետ ռազմական պայմանագրերն, ապա դա կլինի ոչ այնքան պատշաճ արձագանք»,- նկատել է ռազմական փորձագետը։
Նշենք, որ ավելի վաղ ռուսական «Коммерсант» թերթը գրել էր․«Չի բացառվում, որ այս դեպքի (Յուրի Խաչատուրովի նկատմամբ առաջադրված մեղադրանք, խմբ.) արդյունքում Հայաստանի և Ռուսաստանի միջև հարաբերությունները տան բացասական արդյունք այն պայմանավորվածության վրա, ըստ որի, Ռուսաստանից պետք է զենք և զինտեխնիկա մատակարարվի Հայաստան: Պայմանագրի առաջին փաթեթը իրականցվել է 2016 թվականին, երբ Ռուսաստանը տվել է Հայաստանին 200 մլն դոլարի վարկ, հիմա երկրորդ մասը շատ մեծ հարցականի տակ է»:

Ըստ ռուսական պարբերականի՝ Հայաստանում ընթացող վերջին զարգացումները մեծ վնաս են հասցնում կազմակերպությանը․ «Զարմանալի է, թե ինչպես ՀՀ-ում  դա չեն հասկանում»,- նշել է լրատվամիջոցի աղբյուրը։