Մշակույթ
20.12.2023 | 18:13
ՀՀ ԿԳՄՍ նախարարության պատմության և մշակույթի հուշարձանների պահպանության վարչության մասնագետները Պատմամշակութային արգելոց-թանգարանների և պատմական միջավայրի պահպանության ծառայության և Հայաստանի ազգային պատկերասրահի աշխատակիցների հետ միասին այցելել են «Մայրաքաղաք Արտաշատ» հուշարձան, որոնց ուղեկցել են ԳԱԱ Հնագիտության և ազգագրության ինստիտուտի պատմական Արտաշատ մայրաքաղաքի հնագիտական արշավախմբի հնագետները. տեղեկացնում են ԿԳՄՍՆ-ից։
«Մայրաքաղաք Արտաշատ» հուշարձանը գտնվում է Հայաստան-Թուրքիա սահմանային գոտում։
Այցելության նպատակն էր տեղում մշտադիտարկել պատմական մայրաքաղաք Արտաշատի՝ վերջին տարիներին ընթացող պեղման աշխատանքների արդյունքները, ծանոթանալ հայտնաբերված կառույցների վիճակին, տեղում քննարկել դրանց ամրակայման և պահպանության հարցերը՝ հետագայում հուշարձանի հասանելության ապահովման, արգելոց-թանգարանի ընդլայնման և ենթակառուցվածների զարգացման նպատակով։
Կազմակերպվել է այց նաև «Դվին» պատմահնագիտական արգելոց-թանգարան՝ ենթահուշարձաններից մեկում (վաղ միջնադարյան բնակելի տան մնացորդներ) վերականգնման աշխատանքները մշտադիտարկելու և տեղում բարձրացված հարցերը քննարկելու նպատակով։
