Քաղաքականություն
20.12.2023 | 16:19
Վաշինգտոնը պետք է փոխի իր դիրքորոշումը Բաքվի նկատմամբ, որպեսզի ԱՄՆ-ը կարողանա միջնորդի դեր խաղալ Ադրբեջանի և Հայաստանի միջև խաղաղության բանակցություններում։ Այս մասին հայտարարել է Ադրբեջանի նախագահի օգնական Հիքմեթ Հաջիևը, գրում են ադրբեջանական լրատվամիջոցները։
Ըստ նրա՝ ամերիկյան կողմի մոտեցումը, որը նախկինում հնչեցրել է ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ’Բրայենը, «հավասարակշռված չէր»: Հիշեցնենք՝ Վաշինգտոնը դատապարտել էր ԼՂ-ում Բաքվի ռազմական ագրեսիան և դրան հետևած էթնիկ զտումը՝ հայտարարելով, որ երկու երկրների հարաբերությունները նախկինի պես չեն կարող լինել։
«Դա միակողմանի մոտեցում էր, որն անհանգստություն առաջացրեց Ադրբեջանում»,- ասել է Հաջիևը։
Ադրբեջանցի պաշտոնյան նշել է, թե Ազատության աջակցության ակտի 907 ուղղման ընդունումը շարունակում է «հիասթափություն առաջացնել Բաքվում»՝ այն անվանելով «անհասկանալի» և «ամերիկյան Կոնգրեսի պատմության մեջ ամենաանարդար փոփոխություններից մեկը»։
«Ադրբեջանն օտարերկրյա օգնության կամ աջակցության կարիք չունի, քանի որ ինքնաբավ երկիր է։ Բայց այստեղ շատ կարևոր է հոգեբանական ասպեկտը, քանի որ Ադրբեջանի նկատմամբ նման վերաբերմունքն անարդար է»,- ասել է Հիքմեթ Հաջիևը։
Նա նշել է, որ այդ ամենը բարդացնում է Վաշինգտոնի հետ Հայաստան-Ադրբեջան խաղաղության համաձայնագրի շուրջ աշխատանքը։
«Մենք ակնկալում ենք, որ ԱՄՆ գործադիր իշխանության կողմից այլ վերաբերմունք կարող է լինել։ Հենց որ դա լինի և մեզանում որևէ խնդիր չլինի, կկարողանանք շարունակել քննարկումները»,- հայտարարել է Ադրբեջանի նախագահի օգնականը։
Էմմա Չոբանյան
