07.10.2026 | 11:02
2027 թ․ հունվարի 1-ից սոցփաթեթի ծրագիրն ավարտվում է․ փոփոխություններ և նոր հնարավորություններ. ՈՒՂԻՂ
Միջազգային ճգնաժամային խմբի նախագահը պարեկություն է իրականացրել Ադրբեջանի հետ սահմանին
Քաղաքականություն
20.12.2023 | 13:40
Միջազգային ճգնաժամային խմբի նախագահ Կոմֆորտ Էրոն ՀՀ-ում ԵՄ քաղաքացիական դիտորդական առաքելության հետ պարեկություն է իրականացրել Ադրբեջանի հետ սահմանին։ Այս մասին նա հայտնել է X-ում գրառմամբ։
«Ապշեցուցիչ է տեսնել, թե որքան մոտ են երկու կողմերի ռազմական դիրքերը բնակավայրերի վերևում։ Ողջունելի է ԵՄ որոշումը Հայաստանում առաքելության անձնակազմի ավելացման մասին։ Գործողություններն ամբողջ սահմանի երկայնքով կարող են միայն նպաստել կայունությանը: Գյուղացիները դեռ լսում են հաճախակի կրակոցներ, սակայն վերջին ամիսներին զոհերի թիվը նվազել է»,- գրել է Էրոն։
Նա նաև նշել է, որ Ադրբեջանի համագործակցությունն առաքելության հետ կարող է զգալիորեն բարելավել կայունությունը։
«Եթե և՛ Բաքուն, և՛ Երևանը ներգրավեն ԵՄ դիտորդական առաքելությանը, այն կարող է օգնել կանխել միջադեպերն ու տալ անդրսահմանային նախագծերում համագործակցության մեկնարկը։ Ճգնաժամային խումբը երկու կողմերին կոչ է անում վերադառնալ խաղաղ բանակցություններին, այդ թվում՝ սահմանների սահմանազատմանը»,- գրել է Միջազգային ճգնաժամային խմբի նախագահը։
Էրոն հավելել է, որ արևմտյան գործընկերների՝ զարգացումները դիտարկելու ջանքերը կարևոր միջոց են բանակցությունների պայմաններ ստեղծելու համար։
Հիշեցնենք, որ ավելի վաղ ՀՀ ԱԳ նախարար Արարատ Միրզոյանն ընդունել էր Կոմֆորտ Էրոյին: Հանդիպման ընթացքում մտքեր էին փոխանակվել տարածաշրջանային անվտանգությանը վերաբերող հարցերի շուրջ:
Էմմա Չոբանյան
