16.02.2026 | 13:50
ՀՀ-ի և Ադրբեջանի հատուկ ծառայությունները սկսում են խորանալ անհետ կորածների հարցում. Բորիս Նավասարդյան․ ՏԵՍԱՆՅՈՒԹ
ՌԴ-ում Bosch-ի գործարանները վաճառվելու են թուրքական ներդրումային հիմնադրամին
Քաղաքականություն
19.12.2023 | 22:20
Գերմանական Bosch-ը ՌԴ-ում կենցաղային տեխնիկայի արտադրության իր գործարանների վաճառքի շուրջ բանակցություններ է վարում Թուրքիայի ներդրումային հիմնադրամի հետ։ Այս մասին հայտնում է Կոմերսանտը՝ վկայակոչելով սեփական աղբյուրներին։
Նշվում է, որ Bosch-ն ազատել է կենցաղային տեխնիկայի վաճառքի մնացած մենեջերներին և բանակցություններ է վարում բիզնեսը թուրքական Can Holding ներդրումային հիմնադրամին վաճառելու վերաբերյալ: Չինական Hisense-ը դուրս է եկել բանակցություններից, քանի որ թուրքական ընկերությունն ավելի շատ գումար է առաջարկել։
Նոր սեփականատերը Ռուսաստանում Bosch-ի ձեռնարկություններում սկսելու է ոչ միայն սարքավորումների արտադրություն իր սեփական ապրանքանիշերով, այլև պայմանագրային արտադրություն երրորդ կողմի ապրանքանիշերի համար: Ըստ աղբյուրների՝ վերջնական գնորդն ընտրվել է չինացի խաղացողների նկատմամբ եվրոպացի արտադրողների զգուշավոր վերաբերմունքի և թուրքականների հետ տեխնոլոգիական մերձավորության պատճառով։
Bosch ընկերությունը Սանկտ Պետերբուրգի մերձակայքում գտնվող Ստրելնայում իր գործարանների վաճառքի վերջնական փուլում է, լրատվամիջոցին ասել է Jacky’s կենցաղային տեխնիկա արտադրող ընկերության հիմնադիր Հուսեյն Իմանովը։
Բանակցությունների ընթացքին ծանոթ աղբյուրն էլ պարզաբանել է, որ Can Holding-ը նախատեսում է սառնարանների, լվացքի մեքենաների և ներկառուցված սարքերի արտադրություն սկսել Ռուսաստանի Դաշնությունում՝ իր բրենդներով (Awox, Seikon, Telefox, Energia և այլն): Ըստ Կոմերսանտի զրուցակցի՝ գործարքի պայմանները հետգնում չեն ենթադրում։
Կենցաղային տեխնիկայի շուկայում Կոմերսանտի աղբյուրներից մեկն էլ ասել է, որ Bosch-ը «պատրաստ էր բաժանվել գործարանից 20 միլիոն դոլարով, բայց հիմնադրամը նույնիսկ ավելին է առաջարկել»։
«Թե Can Holding-ն ինչպես է նախատեսում օգտագործել Bosch գործարանները, անհասկանալի է՝ հաշվի առնելով, որ այնտեղ սարքավորումները մաշված են և նախատեսված չեն այլ վաճառողի սարքավորումների համար»,- ասել է զրուցակիցը՝ նշելով, որ գործարքը կարող է լինել «գույքի ֆիկտիվ վաճառք»։
Էմմա Չոբանյան
