23.07.2026 | 18:28
Վահան Կոստանյանը Փարիզում քննարկել է Հայաստանի համար եվրոպական շուկայի հասանելիության ընդլայնումը
ՄԱԿ-ը պատրաստ է աջակցել Հայաստանին և Ադրբեջանին հարաբերությունների կարգավորման գործընթացում․ Դյուժարիկ
Քաղաքականություն
19.12.2023 | 14:19
ՄԱԿ-ը պատրաստ է աջակցել Ադրբեջանին և Հայաստանին հարաբերությունների կարգավորման ուղղությամբ շարժվելու հարցում։ Այս մասին ադրբեջանական Report-ի հետ զրույցում հայտարարել է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը։
«ՄԱԿ-ը կարիք չունի ամեն տեղ խաղաղության և անվտանգության հարցերի լուծման գործում առաջատար դեր խաղալու: Մենք գիտենք, որ Ադրբեջանի և Հայաստանի միջև հարցերը լուծելիս այլ երկրներ արդեն հանդես են եկել խաղաղ լուծում գտնելու նախաձեռնությամբ: Գլխավոր քարտուղարը չի ցանկանում ներգրավված լինել մի բանում միայն նրա համար, որ ներգրավված լինի և հնարավոր է՝ իրավիճակը բարդացնի։ Սակայն մենք միշտ պատրաստ ենք աջակցել արդեն գոյություն ունեցող շրջանակներին»,- ասել է Դյուժարիկը։
Նա նաև խոսել է վերջին շաբաթներին հարաբերությունների կարգավորման գործընթացում զարգացումների մասին։
«Իմ տեսանկյունից, որպես այս հարցում անտեղյակ մարդ, թվում է, որ զգալի քայլեր են ձեռնարկվել վերջին մի քանի շաբաթվա ընթացքում: Գլխավոր քարտուղարը դրանք ողջունել է, և մենք պատրաստ ենք աջակցել Հայաստանին ու Ադրբեջանին հարաբերությունների կարգավորման առաջընթացի ճանապարհին»,- նշել է ՄԱԿ-ի ներկայացուցիչը։
Էմմա Չոբանյան
