30.05.2026 | 10:27
ՌԴ-ն Կոպիրկինին կանչել է Մոսկվա՝ ՀՀ–ԵՄ մերձեցման պատճառով
Կոչ ենք անում մարդու իրավունքների թշնամի Ալիևի ռեժիմի դեմ պատժամիջոցներ սահմանել․ Ադրբեջանի ընդդիմությունը դիմում է միջազգային հանրությանը
Քաղաքականություն
19.12.2023 | 21:53
Ադրբեջանի ընդդիմադիր կուսակցությունները միավորող Ժողովրդավարական ուժերի ազգային խորհուրդը հայտարարություն է տարածել՝ կոչ անելով միջազգային կազմակերպություններին ու ժողովրդավարական աշխարհին նպատակաուղղված պատժամիջոցներ սահմանել երկրի իշխող ռեժիմի դեմ՝ քաղաքական բռնաճնշումների պատճառով։
Ազգային խորհուրդը կարծում է, որ ազատ լրատվամիջոցների նկատմամբ ճնշումը և անհիմն և ծիծաղելի մեղադրանքներով այնպիսի քաղաքական առաջնորդների բանտարկությունը, ինչպիսիք են Գուբադ Իբադօղլուն և Թոֆիգ Յագուբլուն, առաջացրել են ժողովրդի զայրույթը։
«Այս քայլերն ամեն օր հավասարապես սրում են երկրում ռեակցիոն ռեժիմի սոցիալական վիճակը, խորացող տնտեսական ճգնաժամը, ինչպես նաև ողջ տարածաշրջանն ընդգրկող եվրաինտեգրման շարժումը և համաշխարհային սպասվող գլոբալ փոփոխությունները։ Ավտորիտարիզմի նկատմամբ ժողովրդավարության հաղթանակի ֆոնին փորձ է արվում վերափոխել երկրի քաղաքական մակարդակը, ապահովագրել հեռանկարային աշխարհաքաղաքական և ներքին սոցիալական սպառնալիքներից՝ ստեղծելով անայլընտրանք միջավայր»,- ասվում է հայտարարության մեջ։
Նշվում է, որ «վնասակար և անհեռանկարային է հանուն ընտանեկան իշխանության պահպանման երկիրը դեպի Արևելք մղելը»։
Ազգային խորհուրդը կոչ է անում Իլհամ Ալիևի ռեժիմին՝ զերծ մնալ Ադրբեջանն ամբողջատիրական կառավարման ճանապարհին դնելուց և ազատ արձակել բոլոր քաղբանտարկյալներին։
«Կոչ ենք անում միջազգային կազմակերպություններին և ժողովրդավարական աշխարհին՝ անտարբեր չմնալ Ադրբեջանում մոլեգնող ռեպրեսիվ ռեժիմի հակամարդկային գործողությունների նկատմամբ և նպատակաուղղված պատժամիջոցներ կիրառել Ալիևի ռեժիմի դեմ, որը դարձել է մարդու իրավունքների և ազատությունների թշնամի»,- ասվում է հայտարարության մեջ։
Հիշեցնենք, որ վերջին շաբաթներին Ադրբեջանի իշխանությունները բռնաճնշումների նոր ալիք են սկսել ընդդիմադիրների, լրագրողների ու քաղհասարակության ներկայացուցիչների դեմ։ Մեկ ամսից էլ պակաս ժամանակահատվածում առնվազն 8 լրագրող է կալանավորվել, ինչպես նաև մի շարք ընդդիմադիր գործիչներ ու ակտիվիստներ։
Էմմա Չոբանյան
