ԱՄՆ-ն առաքելություն կսկսի՝ Կարմիր ծովում նավարկությունների ազատությունն ապահովելու համար

ԱՄՆ-ն առաքելություն կսկսի՝ ապահովելու Կարմիր ծովում նավարկությունների ազատությունը Եմենում Իրանի հետ կապված հութի զինյալների հարձակումների ֆոնին։ Այս մասին հայտարարել է ԱՄՆ պաշտպանության նախարար Լլոյդ Օսթինը, գրում է DW-ի ռուսական ծառայությունը։

Prosperity Guardian գործողությանը, ԱՄՆ-ից զատ, մասնակցելու են նաև Բահրեյնը, Մեծ Բրիտանիան, Իսպանիան, Իտալիան, Կանադան, Նիդերլանդները, Նորվեգիան, Սեյշելները և Ֆրանսիան։

Օսթինը հայտարարել է, որ իրավիճակի սրումը «սպառնում է ազատ առևտրին, վտանգի տակ է դնում անմեղ ծովագնացներին և խախտում միջազգային իրավունքը»։ Կարմիր ծովը հանդիսանում է կարևոր ծովային ճանապարհ և խոշոր առևտրային միջանցք, որն ապահովում է միջազգային առևտուրը։

Միևնույն ժամանակ, ԱՄՆ պետքարտուղար Էնթոնի Բլինքենը Սաուդյան Արաբիայի արտգործնախարար, արքայազն Ֆեյսալ բեն Ֆարհան ալ-Սաուդի հետ հեռախոսազրույցում դատապարտել է Եմենում հութի զինյալների հարձակումները Կարմիր ծովում առևտրային նավերի վրա։ Ամերիկյան դիվանագիտության ղեկավարը կոչ է արել համագործակցել բոլոր գործընկերներին՝ ծովային անվտանգության պահպանման համար։

Միայն դեկտեմբերի 18-ին երկու առևտրային նավ՝ Swan Atlantic-ը և M/V Clara-ն հութիների կողմից հարձակման են ենթարկվել Կարմիր ծովի հարավում։ Ամեն տարի հազարավոր նավեր են անցնում Բաբ էլ-Մանդեբի նեղուցով։

Եմենում Իրանի հետ կապված հութի զինյալները բազմիցս անօդաչու թռչող սարքեր և հրթիռներ են արձակել Իսրայելի ուղղությամբ և հարձակվել Կարմիր ծովում գտնվող նավերի վրա Իսրայել-ՀԱՄԱՍ  պատերազմի մեկնարկից ի վեր:

Էմմա Չոբանյան