Ուժգին երկրաշարժ Չինաստանում․ տուժածներ և ավերածություններ կան․ ՏԵՍԱՆՅՈՒԹ

Չինաստանի հյուսիս-արևմուտքում տեղի ունեցած երկրաշարժի հետևանքով զոհվել է առնվազն 118, վիրավորվել՝ ավելի քան 250 մարդ։ Փրկարարները ողջ մնացածներին որոնում են սառնամանիքների պայմաններում՝ -13°C ջերմաստիճանում, գրում է BBC-ի ռուսական ծառայությունը։

Երկրաշարժը տեղի է ունեցել Գանսու նահանգում կեսգիշերին մոտ՝ փլուզելով շենքեր և վնասելով ենթակառուցվածքներ ինչպես Գանսուում, այնպես էլ հարևան Ցինհայ նահանգում:

ԱՄՆ Երկրաբանական ծառայության (USGS) տվյալներով՝ երկրաշարժի ուժգնությունը կազմել է 6,2 մագնիտուդ, օջախի խորությունը՝ 10 կմ։

Աղետի գոտի են ուղարկվել հազարավոր հրշեջներ և փրկարարներ, բանակը ներգրավվել է փրկարարական աշխատանքներում։ Նրանք գործում են զրոյից ցածր ջերմաստիճանում, ինչը ռեկորդային է տարածաշրջանի համար: Երկրաշարժի գոտու լուսանկարներից երևում է, որ փրկարարները փլուզված շենքերի փլատակների տակ որոնողական աշխատանքներ են իրականացնում:

Որոշ շրջաններում էլեկտրաէներգիայի և ջրի մատակարարումը խափանվել է:

Երկրորդ երկրաշարժը գրանցվել է Սինցզյան նահանգում։

Չինաստանի ղեկավար Սի Ցզինպինը հայտարարել է, որ «պետք է գործադրվեն բոլոր ջանքերը՝ որոնողափրկարարական աշխատանքներ իրականացնելու, տուժածներին ժամանակին օգնություն ցուցաբերելու և զոհերի թիվը նվազագույնի հասցնելու համար»։

Ջիքսիշան շրջանի իշխանությունները, որտեղ եղել է երկրաշարժի էպիկենտրոնը, հայտնել են, որ վնասվել է մոտ 5,000 շենք և շինություն:

Իշխանությունները մարդկանց խնդրել են չմոտենալ աղետի վայրին՝ տեղեկացնելով, որ ավելի շատ հետցնցումներ կարող են տեղի ունենալ երկրաշարժից տուժած Տիբեթյան բարձրավանդակում 10 հետցնցումներից հետո:

Մանրամասները՝ տեսանյութում։

New : 111 people have been killed and more than 200 have been injured after a 6.2-magnitude earthquake hit China's #Gansu and #Qinghai provinces.#Earthquake #ChinaEarthquake pic.twitter.com/0UVibOR5hN

— Anand Panna (@AnandPanna1) December 19, 2023