19.06.2026 | 13:14
ՍԴ-ն ընտրությունների արդյունքների վերաբերյալ պարտավոր է որոշում կայացնել դիմումի մուտքագրման օրվանից ոչ ուշ, քան 15 օր հետո
Նավալնիի պահանջների քննարկումը կասեցվել է. դատավորները չգիտեն՝ որտեղ է նա
Քաղաքականություն
18.12.2023 | 18:02
Դատավորները կասեցրել են ռուսաստանցի ընդդիմադիր գործիչ, ազատազրկման մեջ գտնվող Ալեքսեյ Նավալնիի հայցի քննարկումը՝ մինչև «պարզվի քաղաքական գործչի գտնվելու վայրը»։ Այս մասին հայտնել է գործչի մամլո քարտուղար Կիրա Յարմիշը, գրում է BBC-ի ռուսական ծառայությունը։
Նավալնիի համախոհներն ահազանգում են, որ արդեն 13 օր է՝ անհայտ է նրա գտնվելու վայրը։ Ուրբաթ տեղեկություններ էին հայտնվել, որ նրան տեղափոխել են այլ գաղութ։
«Այսօր Ալեքսեյ Նավալնին 7 դատավարության պետք է մասնակցեր։ Առաջին երկուսն արդեն կայացել են, նրան անգամ տեսակապով չեն միացրել։ Գործերը կասեցվել են՝ մինչև Նավալնիի գտնվելու վայրը պարզելը»,- X-ում գրել է Յարմիշը։
Ըստ նրա՝ հանգստյան օրերին Նավալնիի գործընկերները հարցումներ են կատարել երկրի ավելի քան 200 նախնական կալանքի կենտրոններ։
«Սպասում ենք պատասխանների»,- հավելել է նա:
«Նավալնիի թիմը» Telegram-ալիքը նշում է, որ դատավորը պետք է «ապահովեր հայցվորի ներկա գտնվելը» և չկասեցներ դատավարությունը։
Դեկտեմբերի 6-ին քաղաքական գործչի կողմնակիցները հայտնել էին, որ Նավալնիին թույլ չեն տվել տեսակցել իր փաստաբանի հետ։ Այդ ժամանակից ի վեր ընդդիմադիր գործչին տեսակապով չեն միացրերլ՝ մասնակցելու գաղութի դեմ իր պահանջների վերաբերյալ դատական նիստերին։
