Քաղաքականություն
18.12.2023 | 14:44
ԵՄ-ն այսօր ընդունելու է Ռուսաստանի դեմ պատժամիջոցների 12-րդ փաթեթը։ Այս մասին հայտնում է Financial Times-ը՝ հղում անելով իր աղբյուրներին, փոխանցում է BBC-ի ռուսական ծառայությունը։
Լրատվամիջոցի տվյալներով՝ պատժամիջոցների փաթեթը հաջողվել է համաձայնել այն բանից հետո, երբ Ավստրիան հասել է Ուկրաինայից զիջումների ավստրիական Raiffeisen բանկի՝ որպես «պատերազմի հովանավոր» կարգավիճակի վերաբերյալ։ Հանգստյան օրերին Ուկրաինայի իշխանությունները հայտնել էին, որ բանկը ժամանակավորապես հանել են սև ցուցակից։
Վիեննան պաշտոնապես ասել է անդամ մյուս երկրներին, որ իր իրավաբաններին ավելի շատ ժամանակ է պետք առաջարկված միջոցները գնահատելու համար, սակայն ԵՄ մի քանի դիվանագետներ պնդում են, որ իրական խնդիրը բանկի շուրջ ստեղծված իրավիճակն էր։ Քանի որ ԵՄ անդամ մնացած 26 երկրներն արդեն ստորագրել են պատժամիջոցների փաթեթը, FT-ի աղբյուրներն ասել են, որ նոր միջոցները կհաստատվեն այսօր:
«Հիմա դա ձևականություն է»,- ասել է աղբյուրներից մեկը։
Նշվում է, որ դեռևս պաշտոնապես չհրապարակված փաթեթում ամենաուշագրավ նորամուծությունը Ռուսաստանից ադամանդի ներկրման արգելքն է։ ԵՄ-ն նաև ուժեղացնելու է ռուսական նավթի նկատմամբ գնային շեմի պահպանման վերահսկողությունը։ Ալյումինն առաջին անգամ կենթարկվի սահմանափակող միջոցների, արգելքը կազդի նաև ռուսական մետաղալարերի, փայլաթիթեղի և խողովակների արտահանման վրա։
Նոր փաթեթում թուլացվելու է վերահսկողությունը Ռուսաստանից շքեղ ապրանքների նկատմամբ։ ԵՄ քաղաքացիներին թույլատրվելու է պահպանել իրենց անձնական մեքենաները Ռուսաստանից դուրս գալիս։
Էմմա Չոբանյան
