Քաղաքականություն
18.12.2023 | 13:23ՀԱՄԱՍ-ի քաղբյուրոյի փոխնախագահ Սալեհ ալ-Արուրին և շարժման նախկին ղեկավար Խալեդ Մաշաալը գաղտնի հանդիպում են անցկացրել Թուրքիայում, հաղորդում է Kan ռադիոն։ Նրա խոսքով` հանդիպմանը ներկա են եղել նաև շարժման այլ բարձրաստիճան ներկայացուցիչներ։ Հանդիպման ընթացքում քննարկվել են Իսրայելի հետ հակամարտությունում ՀԱՄԱՍ-ի հետագա քայլերը։
Kan-ը նշում է, որ դեմ առ դեմ հանդիպում անցկացնելու որոշումը պայմանավորված էր այն մտավախությամբ, որ իսրայելական հետախուզական ծառայությունները կկարողանան հասանելիություն ունենալ քննարկման ընթացքում ասվածին, եթե այն կազմակերպվեր հեռակա կարգով։ Ըստ ռադիոկայանի՝ ՀԱՄԱՍ-ի ներկայացուցիչները քննարկել են Գազայի հատվածում և Լիբանանում զինյալների գործունեությունը, ինչպես նաև պատանդների փոխանակման նոր գործարքը:
Դեկտեմբերի 17-ին Reuters-ը, վկայակոչելով իր աղբյուրներին, հայտնել էր, որ Իսրայելն ու ՀԱՄԱՍ-ը պատրաստ են հրադադար վերահաստատել Գազայի հատվածում։ Նոր ժամանակավոր զինադադար հայտարարելու համար ՀԱՄԱՍ-ը պահանջում է պատանդների ցուցակ կազմել՝ միակողմանի ազատ արձակելու համար։ Բացի այդ, իսրայելական բանակը պետք է նահանջի նախապես համաձայնեցված գծերից։ Reuters-ի աղբյուրն ասում է, որ Իսրայելը չի համաձայնել վերջին պահանջին:
Եգիպտոսը և Քաթարը, հանդես գալով որպես բանակցություններում միջնորդներ, որպես զինադադար սկսելու պայման նշել են Գազայի հատվածի հարավում գտնվող մեկ այլ՝ Քերեմ Շալոմ անցակետի բացումը։ Դեկտեմբերի 17-ին անցակետը բացվեց, սակայն դրանով մարդասիրական օգնության տեղափոխումը դեռ չի սկսվել։
