25.02.2026 | 09:27
Ապրիլի 1-ից կենսաթոշակները կբարձրանան․ Նիկոլ Փաշինյան
Լրագրող Եկատերինա Դունցովան ընտրություններում կմրցի Պուտինի հետ
Քաղաքականություն
18.12.2023 | 16:56
Նախաձեռնող խումբը պաշտպանել է լրագրող Եկատերինա Դունցովայի թեկնածությունը ՌԴ նախագահական ընտրություններում։ Դեկտեեմբերի 17-ին տեղի ունեցած հանդիպմանը մասնակցել է ավելի քան 700 մարդ՝ անհրաժեշտ նվազագույն 500 հոգու դիմաց։ DW-ի ռուսական ծառայության փոխանցմամբ՝ հանդիպմանը մասնակցել է նաև Ռուսաստանի Դաշնության Կենտրոնական ընտրական հանձնաժողովի (ԿԸՀ) ներկայացուցիչը։
«7×7 – Հորիզոնական Ռուսաստան» Telegram ալիքն իր հերթին հաղորդում է, որ հանդիպման վայր են եկել երկու ոստիկաններ։ Իրավապահները հայտնել են, թե իրենք զանգ են ստացել, որը, իբր, կապ չունի Դունցովայի նախաձեռնող խմբի հանդիպման հետ։
Այժմ նախաձեռնող խումբը պետք է գրանցվի Կենտրոնական ընտրական հանձնաժողովում։ Դրանից հետո, մինչև հունվարի 25-ը, Դունցովան պետք է իր առաջադրման համար առնվազն 300 հազար ստորագրություն հավաքի Ռուսաստանի մարզերի բնակիչներից։ Ստորագրությունների իսկությունը կստուգվի։
Եկատերինա Դունցովան լրագրող է, կամավոր որոնողափրկարարական խմբի համակարգող, աշխատել է որպես Ռժևի քաղաքային խորհրդի պատգամավոր։ Նոյեմբերի 16-ին նա հայտարարել է նախագահական ընտրություններում առաջադրվելու իր մտադրության մասին՝ բացատրելով այս որոշումը նրանով, որ «վերջին տասը տարիների ընթացքում երկիրը սխալ ուղղությամբ է ընթանում. ուղին տանում է ոչ թե դեպի զարգացման, այլ ինքնաոչնչացում»։
Դունցովան հանդես է գալիս Ուկրաինայում ռազմական գործողությունների դադարեցման, ժողովրդավարական բարեփոխումների և քաղբանտարկյալների ազատ արձակման օգտին:
Դեկտեմբերի սկզբին լրագրողը հայտնել էր, որ ՎՏԲ բանկն արգելափակել է իր անունով փոխանցումներն այն բանից հետո, երբ նա դիմել է աջակիցներին՝ խնդրելով ֆինանսական աջակցություն:
