18.03.2026 | 18:39
Ալիևներն այցով Արցախում են
Հյուսիսային Կորեան 12 ժամում երկրորդ բալիստիկ հրթիռն է արձակել
Քաղաքականություն
18.12.2023 | 18:24
Հյուսիսային Կորեան 12 ժամվա ընթացքում երկրորդ բալիստիկ հրթիռն է արձակել։ Այս մասին հայտնել է Հարավային Կորեայի զինված ուժերի շտաբի պետերի միացյալ շտաբը։ Նշվում է, որ հրթիռը դեպի ծով է արձակվել Փհենյանի մոտ գտնվող տարածքից, փոխանցում է DW-ի ռուսական ծառայությունը։
Հյուսիսային Կորեայի կողմից բալիստիկ հրթիռի արձակման մասին տեղեկությունը հաստատել է նաև Ճապոնիայի Պաշտպանության նախարարությունը։ Ճապոնական առափնյա պահպանության ծառայության տվյալներով՝ հրթիռն արձակվելուց մեկ ժամ անց ընկել է ծովը՝ Հոկայդո քաղաքից արևմուտք։ Հյուսիսային Կորեայի արձակած հրթիռը թռել է մոտ 6000 կմ բարձրության վրա, թռիչքի հեռահարությունը կազմել է 1000 կմ, ավելի ուշ հստակեցրել է Ճապոնիայի ՊՆ-ն։
Տոկիոն Պեկինում դիվանագիտական ուղիներով խիստ բողոք է հղել Փհենյանի կողմից հրթիռի արձակման կապակցությամբ, ասվում է նախարարության հայտարարության մեջ։
Ավելի վաղ՝ դեկտեմբերի 17-ի երեկոյան, ԿԺԴՀ-ն արձակել էր փոքր հեռահարության բալիստիկ հրթիռ։ Հարավկորեացի զինվորականների տվյալներով՝ հրթիռը թռել է մոտ 570 կմ և ընկել ծովը։ Դրա արձակումը համընկել է Հյուսիսային Կորեայի նախկին առաջնորդ Կիմ Չեն Իրի մահվան 12-րդ տարելիցի հետ։
Միացյալ Նահանգները դատապարտել է Հյուսիսային Կորեայի կողմից դեկտեմբերի 17-ին բալիստիկ հրթիռների արձակումը։
«Այս արձակումները խախտում են ՄԱԿ-ի բազմաթիվ բանաձևեր, սպառնալիք են Հյուսիսային Կորեայի հարևանների համար և խաթարում են տարածաշրջանային անվտանգությունը»,- ասվում է Պետքարտուղարության հայտարարության մեջ։
